پشاور امتحانی اسکینڈل: طلبہ کو نقل کروانے والا پورا عملہ بے نقاب، تاحیات نااہل قرار

پشاور کے زریاب کالونی میں قائم ایک امتحانی مرکز میں طلبہ کو منظم انداز میں نقل کروانے کا انکشاف ہوا ہے، جس کے بعد امتحانی عملے کے چار افراد کو فوری طور پر فارغ کر کے بورڈ ڈیوٹی سے ہمیشہ کے لیے نااہل قرار دے دیا گیا۔

قائم مقام کمشنر پشاور و چیئرمین تعلیمی بورڈ ریاض محسود کے حکم پر کارروائی اُس وقت ہوئی جب اسسٹنٹ کمشنر شہروز مفتی نے اچانک رائل اسکول کا معائنہ کیا۔ دورے کے دوران طلبہ کو نقل کرتے ہوئے رنگے ہاتھوں پکڑا گیا، جبکہ عملہ اور اسکول انتظامیہ مبینہ طور پر معاونت کر رہے تھے۔

طلبہ سے گائیڈز اور غیر متعلقہ مواد بھی برآمد ہوا۔ ریاض محسود نے معاملے پر شدید برہمی کا اظہار کرتے ہوئے متعلقہ اہلکاروں کے خلاف سخت انضباطی کارروائی کا حکم دیا اور متبادل عملے کی فوری تعیناتی کے احکامات بھی جاری کیے۔

انہوں نے واضح کیا کہ نقل کو ہر قیمت پر روکا جائے گا اور ذمہ داروں کو کسی صورت معاف نہیں کیا جائے گا۔