لاہور ہائی کورٹ میں پولیس کی جانب سے پتنگ بازی اور ہوائی فائرنگ میں ملوث افراد کو سزا کے طور پر گنجا کرکے ویڈیوز سوشل میڈیا پر اپ لوڈ کرنے پر معافی مانگ لی گئی۔
عدالت میں ڈی آئی جی آپریشنز، ڈی آئی جی لیگل اور ایڈووکیٹ جنرل پنجاب پیش ہوئے۔ ویڈیوز عدالت میں دکھائی گئیں جن پر عدالت نے سخت برہمی کا اظہار کیا۔
ڈی آئی جی فیصل کامران نے مؤقف اپنایا کہ ویڈیوز کی نوعیت کا پہلے اندازہ نہیں تھا، اور عدالت سے غیر مشروط معافی مانگی۔ عدالت نے واضح کیا کہ قانون کی خلاف ورزی برداشت نہیں کی جائے گی۔
عدالت نے خبردار کیا کہ آئندہ کسی پولیس افسر نے ایسی حرکت کی تو سخت قانونی کارروائی ہوگی۔ ایس ایچ او نے اپنے والد کی بیماری کا عذر پیش کیا اور معافی مانگی، جبکہ کانسٹیبلز نے وکیل مقرر کرنے کی مہلت مانگی۔
درخواست گزار وشال شاکر نے یہ درخواست دائر کی تھی جس پر جسٹس علی ضیا باجوہ سماعت کر رہے تھے۔ عدالت نے آئی جی پنجاب سے جواب طلب کرتے ہوئے سماعت کل تک ملتوی کر دی۔
