لاہو ر( سپورٹس ڈیسک) پاکستان کرکٹ بورڈ (پی سی بی) نے پاک افغان ٹی ٹونٹی سیریز کے لئے اسکواڈ کا اعلان کردیا جس میں شاداب خان کو کپتان مقرر کیا گیا ہے
چیف سلیکٹر ہارون رشید کے ہمراہ پی سی بی ہیڈ کوارٹرز لاہور میں پریس کانفرنس کرتے ہوئے پاکستان کرکٹ بورڈ کی مینجمنٹ کمیٹی کے چیئرمین نجم سیٹھی نے کہا کہ ہم سے افغانستان نے سیریز کے لیے رابطہ کیا کیونکہ ان کی آسٹریلیا کے ساتھ سیریز ختم ہوگئی ہے، ہماری ٹیم کے کھلاڑیوں کے ریسٹ اور انجریز کے سبب ہم نے منع کرنے کی کوشش کی لیکن ان کا بہت اصرار تھا اس لیے ہم نے درخواست قبول کرلی۔
انہوں نے کہا کہ اس حوالے سے افغانستان کے ساتھ معاملات طے کرنے کے لیے بات چیت چلتی رہی، اس دوران میڈیا میں مختلف طرح کی قیاس آرائیاں بھی شروع ہوگئیں حالانکہ ہم نے کسی قسم کا کوئی عندیہ نہیں دیا تھا۔انہوں نے کہا کہ اب اس حوالے سے افغانستان کے ساتھ ہمارے معاملات طے پاگئے ہیں، تمام سینئر کھلاڑیوں کو اعتماد میں لے کر فیصلے کیے ہیں اس پر سب کو اتفاق ہے، ہمیں اب ورلڈکپ کا سوچنا ہے، ابھی سے اسسمنٹ کریں گے تو ابھی سے یہ کام کرنا پڑے گا۔
انہوں نے کہا کہ آگے بہت سارے میچز آرہے ہیں، اس لیے ہم نے سوچا کہ کچھ پلیئر کو آرام دینا چاہیے، جن کی انجریز ہیں ان کو بھی آرام دینا چاہیے۔انہوں نے کہا کہ ہمیں اصل دھیان اب ورلڈ کپ پر دھیان دینا ہے، نوجوان کھلاڑیوں کو تیار کرنے کے لیے ابھی سے کام شروع کرنا پڑے گا، اس لیے نوجوان کھلاڑیوں کو جانچنے کے لیے ہم اس سیریز کو ٹریننگ رانڈ سمجھیں گے۔
نجم سیٹھی نے کہا کہ ہم بابر اعظم، رضوان، فخر، حارث رئوف اور شاہین آفریدی کو ریسٹ دے رہے ہیں، میں نے سب سے بات کرلی ہے، کسی کو کوئی اعتراض نہیں ہے، بابر ہمارا بہترین کپتان ہے، وہ ٹیم کے کپتان برقرار ہیں، جس دن وہ کہیں گے اس پر ان کی کپتانی کا فیصلہ کریں گے، ہمارے سینئر کھلاڑیوں کو کوئی خطرہ نہیں ہے، ان کی جگہ پکی ہے، نئے کھلاڑیوں کو ٹیسٹ کررہے ہیں۔چیئرمین پی سی بی نے اعلان کیا کہ پاک افغان ٹی ٹونٹی سیریز کے لیے شاداب خان کو کپتان بنانے کا فیصلہ کیا ہے۔
چیف سلیکٹر نے قومی ٹیم کا اعلان کرتے ہوئے بتایا کہ اسکواڈ میں احسان اللہ، صائم ایوب، طیب طاہر اور زمان خان ڈیبیو کریں گے، اس کے علاوہ اعظم خان، عبداللہ شفیق، فہیم اشرف، افتخار احمد، محمد حارث، محمد نواز، وسیم جونیئر، نسیم شاہ، شان مسعود اور عماد وسیم اسکواڈ کا حصہ ہوں گے۔انہوں نے کہا کہ ابرار احمد، حسیب اللہ اور اسامہ میر سیریز کے لیے ریزرو کھلاڑی ہوں گے۔خیال رہے کہ پاکستان اور افغانستان کے درمیان تین ٹی ٹونٹی میچز کی سیریز 24سے 27مارچ تک شارجہ میں کھیلی جائے گی۔
