لاہور: وزیر اطلاعات پنجاب عظمیٰ بخاری کا کہنا ہے کہ پاکستان میں ایک مخصوص طبقہ ایسا بھی ہے جسے ملک میں ترقی یا مثبت پیش رفت بھی ناگوار گزرتی ہے۔
پریس کانفرنس میں گفتگو کرتے ہوئے عظمیٰ بخاری نے کہا کہ اگرچہ ملک میں موسم گرم ہے، لیکن سیاسی میدان میں کامیابیوں کی بہار آئی ہوئی ہے۔ پنجاب حکومت کی حالیہ کامیابیوں سے جہاں عوام خوش ہیں، وہیں کچھ حلقے اس سے ناخوش دکھائی دیتے ہیں۔
انہوں نے وفاقی بجٹ 2025-26 پر تبصرہ کرتے ہوئے وزیر اعظم شہباز شریف کو خراج تحسین پیش کیا اور کہا کہ اس بار بجٹ میں تنخواہ دار طبقے کے لیے ریلیف شامل کیا گیا ہے، جو ایک خوش آئند قدم ہے۔
عظمیٰ بخاری نے مزید کہا کہ کچھ عناصر قومی سطح پر جاری مثبت پیش رفت کو قبول کرنے کے لیے تیار نہیں۔ انہوں نے کل قومی اسمبلی میں ہونے والے احتجاج کا ذکر کرتے ہوئے کہا کہ ایسے لوگ پاکستان کو بحرانوں میں دھکیلنا چاہتے ہیں۔
انہوں نے اسٹاک مارکیٹ میں 2100 پوائنٹس کے اضافے کو معاشی استحکام کی علامت قرار دیا اور کہا کہ پی ٹی آئی جیسی جماعتیں ملکی ترقی میں اپنا کردار ادا کرنے کی بجائے صرف انتشار پھیلانے پر تلی ہوئی ہیں۔ ان کا کہنا تھا کہ چند یوٹیوبر بیرون ملک بیٹھ کر صرف شور مچاتے ہیں۔
عظمیٰ بخاری نے اس بات پر زور دیا کہ وزیر اعظم اور وزیر اعلیٰ پنجاب تنخواہ نہیں لیتے اور ہم جیسے متوسط طبقے کے لوگ بھی سیاست میں آ کر خلوص نیت سے کام کر رہے ہیں۔ انہوں نے کہا کہ سیاست کو کاروبار نہیں بنانا چاہیے، بلکہ خدمت کا ذریعہ ہونا چاہیے۔
