لاہو ر( کامرس ڈیسک) فائونڈر گروپ کے سرگرم رکن پاکستان سٹون ڈویلپمنٹ کمپنی کے بور ڈ آف ڈائریکٹرز کے رکن خادم حسین نے پاکستان اور اٹلی کے درمیان تجارتی حجم2ارب یورو تک پہنچنے کو خوش آئند قرار
دیتے ہوئے کہا ہے کہ دونوں ملک کے درمیان تجارتی سرگرمیوں میں اضافہ ہورہا ہے ، اٹلی کی ماربل انڈسٹریز میں تجربہ اور جدید ٹیکنالوجی کے استعمال سے ملکی ماربل انڈسٹری ترقی کرے اور اٹلی کے ماربل انڈسٹریز میں تجربہ سے استفادہ کرکے ملکی ماربل مصنوعات کی بیرون ملک برآمدات میں اضافہ سے ملک کو کثیر زرمبادلہ حاصل ہوگااور ملکی برآمدات میں اضافہ اور برآمدات کے اہداف کا حصول ممکن ہوسکے گا۔
ان خیالات کااظہار انہوںنے فیروز پور بورڈ کے تاجروں کے وفد سے گفتگو کرتے ہوئے کیا۔فائونڈر گروپ کے رہنما میاں محمد اشرف نے کہا کہ اٹلی کو پاکستانی برآمدات درآمدات کی نسبت زیادہ ہیں جس سے ملکی صنعتی شعبہ ترقی کرے گا ۔ پاکستان کی اٹلی کے ساتھ تجارت سرپلس ہے ۔220ملین سے زائد آبادی کے ساتھ پاکستان اطالوی صنعتکاروںاور تاجروں کیلئے ایک بڑی اور پرکشش مارکیٹ ہے، پاکستان اور اٹلی کے سفارتخانے تجارت اور سرمایہ کاری کے فروغ کیلئے دونوں ممالک کی کمپنیوںکی بھر پور سپورٹ کرتے ہیں ۔انہوںنے کہا کہ پاکستان کی اٹلی کو برآمدات میں اضافہ سے ملکی مجموعی تجارتی خسارہ کو کنٹرول کرنے میں بھی مدد ملے گی اور ملکی صنعتی شعبہ بھی ترقی و خوشحال راہوں پر گامزن ہوگا۔