اسلام آباد: پاکستانی ڈاکٹروں کی ایک غیرمعمولی تعداد نے گزشتہ سال امریکا میں رہائش حاصل کر لی ہے، جو ایک نیا ریکارڈ بن چکا ہے۔
پاکستان میڈیکل اینڈ ڈینٹل کونسل (پی ایم ڈی سی) کے صدر ڈاکٹر رضوان تاج کے مطابق، یہ اب تک امریکی ریزیڈنسی حاصل کرنے والے پاکستانی ڈاکٹروں کی سب سے بڑی تعداد ہے۔
ڈاکٹر رضوان تاج نے اس کامیابی کو پاکستانی میڈیکل ایجوکیشن کے معیار کی ایک بہترین عکاسی قرار دیا اور کہا کہ 1061 ڈاکٹروں کی کامیابی ہمارے لیے باعث فخر ہے۔
انہوں نے مزید کہا کہ پاکستانی ڈاکٹروں نے یو ایس ایم ایل ای، انٹرویوز اور دیگر سخت مراحل کی کامیابی سے تکمیل کے بعد یہ کامیابی حاصل کی۔ اس کا سہرا پاکستانی میڈیکل تعلیم کے اعلیٰ معیار کو جاتا ہے، جو عالمی سطح پر پاکستانی ڈاکٹروں کو کامیاب ہونے کی راہ پر گامزن کرتا ہے۔
ڈاکٹر رضوان تاج نے کہا کہ ہمارا مقصد عالمی معیار کے ہیلتھ پروفیشنلز تیار کرنا ہے، اور پاکستانی ڈاکٹروں کی عالمی صحت کے نظام میں شمولیت ایک اہم سنگ میل ہے۔
کنگ ایڈورڈ، ڈاؤ، اور علامہ اقبال میڈیکل کالجز کے کئی طلبا نے امریکی ریزیڈنسی حاصل کرنے میں کامیابی حاصل کی ہے۔
