فیصل آباد (کامرس ڈیسک)ٹیکسٹائل گروپ کی برآمدات میں جاری مالی سال کے پہلے 10 ماہ میں سالانہ بنیادوں پر 7فیصد کی کمی ریکارڈ کی گئی ہے۔
پاکستان بیورو برائے شماریات اور سٹیٹ بینک کی جانب سے اس حوالے سے جاری کردہ اعدادوشمارکے مطابق جولائی سے اپریل تک کی مدت میں ٹیکسٹائل گروپ کی برآمدات کا حجم 14.11ارب ڈالر ریکارڈ کیا گیا جو گزشتہ مالی سال کی اسی مدت کے مقابلے میں 7فیصد کم ہے۔گزشتہ مالی سال کی اسی مدت میں ٹیکسٹائل گروپ کی برآمدا ت سے ملک کو 15.09ارب ڈالر کا زرمبادلہ حاصل ہوا تھا۔
اپریل میں ٹیکسٹائل گروپ کی برآمدات کا حجم 1.17ارب ڈالر ریکارڈ کیا گیا جو گزشتہ سال اپریل کے مقابلے میں 26فیصد کم ہے۔ گزشتہ سال اپریل میں ٹیکسٹائل مصنوعات کی برآمدات سے 1.58ارب ڈالر کا زرمبادلہ حاصل ہواتھا۔ مارچ کے مقابلے میں اپریل میں ٹیکسٹائل گروپ کی برآمدات میں ماہانہ بنیادوں پر10فیصد کی کمی ریکارڈ کی گئی ہے۔
مارچ میں 1.31ارب ڈالر کی ٹیکسٹائل مصنوعات برآمد کی گئیں جو اپریل میں کم ہوکر1.17ارب ڈالر ہوگئیں۔واضح رہے کہ جاری مالی سال کے پہلے 10ماہ میں ملکی برآمدات میں سالانہ بنیادوں پر14فیصد کی کمی دیکھنے میں آئی ہے۔
