لاہور: پاکستان کے معروف میوزک پلیٹ فارم ویلو ساؤنڈ سٹیشن کے سیزن 3 کا شاندار آغاز ہو چکا ہے۔ سینما کی دنیا میں تہلکہ مچانے والے ہدایتکار بلال لاشاری اور پروڈیوسر عمارہ حکمت اس بار میوزک ویڈیوز کے ذریعے ناظرین کے دل جیتنے میدان میں آئے ہیں۔
لاہور فورٹ میں منعقدہ افتتاحی تقریب میں عاطف اسلم، فواد خان، میشا شفیع، ینگ سٹنر، شئے گل، انورل خالد، زین زوہیب، فارس شفیع اور دیگر معروف فنکاروں نے شرکت کی، جبکہ ایچ ایس وائے نے میزبانی کے فرائض انجام دیے۔ سیزن کا آغاز فارس شفیع اور زین زوہیب کے زبردست ویڈیو سونگ سے ہوا، جسے شرکاء نے خوب سراہا۔
سیزن 3 میں ہر ہفتے نئی میوزک ویڈیوز جاری کی جائیں گی جن میں عاطف اسلم، فواد خان، حسن رحیم، نتاشا نورانی، فیض، عبد الحنان اور عدنان دھول اپنی آواز کا جادو جگائیں گے۔
بلال لاشاری، جنہوں نے "دی لیجنڈ آف مولا جٹ” اور "وار” جیسی فلموں سے شہرت حاصل کی، اب میوزک کے میدان میں بھی اپنے تخلیقی وژن کے ساتھ نئی تاریخ رقم کرنے کو تیار ہیں۔
