زیورخ(سپورٹس ڈیسک)قطر میں ہونے والے فٹبال ورلڈکپ 2022 کے فائنل میں فرانس کے خلاف فتح کا جشن منانے کے دوران فیفا کنڈکٹ کی خلاف ورزی پر میسی کی ٹیم کے خلاف فیفا کی ڈسپلنری کمیٹی نے کارروائی کا فیصلہ کرلیا ۔
تفصیلات کے مطابق فرانس کیخلاف ارجنٹینا نے فائنل میں 2ـ4 سے کامیابی حاصل کی تھی، ورلڈکپ فائنل کا فیصلہ پینالٹی ککس پر ہوا تھا۔تاریخی فتح کے بعد بہترین گول کیپر کا گولڈن گلوو ایوارڈ جیتنے والے ارجنٹینا کے گول کیپر ایمیلیانو مارٹینز نے ایوارڈ کے ساتھ نامناسب اشارہ کیا تھا .
جبکہ فائنل تقریب کے اختتام کے بعد ڈریسنگ روم میں جشن منانے کے دوران انہوں نے گولڈن بوٹ ایوارڈ جیتنے والے فرینچ فٹبالر ایمباپے پر بھی طنز کیا تھا اور کہا تھا کہ ایمباپے جو مرگیا۔وطن واپس پہنچنے پر ٹیم کی وکٹری پریڈ کے دوران مارٹینز کے ہاتھ میں ایک گڑیا تھی جس پر ایمباپے کے چہرے کا کٹ آؤٹ لگا تھا،
اس دوران ان کے برابر میں ارجنٹینا کے کپتان میسی بھی موجود تھے جو کہ ایمباپیکے ساتھ فرنچ کلب پی ایس جی سے کھیلتے ہیں، اس عمل پر بھی فٹبال کے حلقوں میں مارٹینز کو تنقید کا سامنا کرنا پڑا۔ایک بیان میں فیفا کے مطابق ڈسپلنری کمیٹی نے ورلڈکپ فائنل میں کھلاڑیوں اور آفیشلز کے رویے اور برتاؤ سے متعلق قوانین کی خلاف ورزی پر ارجنٹینا فٹبال ایسوسی ایشن کے خلاف کارروائی کا آغاز کیا ہے۔
یاد رہے کہ دسمبر 2022 میں قطر میں ہونے والے فیفا ورلڈکپ فائنل میں ارجنٹینا نے دفاعی چیمپئن فرانس کو شکست دے کر تیسری بار ورلڈکپ جیتنے کا اعزاز حاصل کیا تھا۔
