کراچی(نمائندہ خصوصی)پاکستان پیپلزپارٹی کے سینئررہنمااورسابق صوبائی وزیرشرجیل میمن نے کہا ہے کہ نگراں حکومت کو ٹارگٹڈ سبسڈی کی طرف جانا پڑے گا۔
کراچی پریس کلب میں پاکستان پیپلزپارٹی کے چیئرمین بلاول بھٹوزرداری کی سالگرہ تقریب کے بعدمیڈیا سے گفتگو کرتے ہوئے شرجیل میمن نے کہا کہ پیپلز پارٹی کا آزادی صحافت اور بحالی جمہوریت میں اہم کردار ہے، ملکی مسائل کا حل پیپلزپارٹی کے قیادت کے پاس ہے اور یہی عوام کو مہنگائی کے طوفان سے نکال سکتی ہے۔
انہوں نے کہا کہ پیپلز پارٹی نے عوام کو ریلیف دیا ہے تو عوام نے ووٹ دیا ہے، ہم نے عوام کو مفت صحت کی سہولیات فراہم کیں۔شرجیل میمن نے کہاکہ لوگ بجلی کے بلوں کے لئے نکلے ہیں، سستی بجلی کا پہلا خیال شہید بینظیر بھٹو کو آیا، تھر سے سستی بجلی پیدا کی جا رہی ہے، مسائل سے نمٹنے کے لئے ٹارگیٹڈ سبسڈی صرف غریبوں اور مزدوروں دینی پڑے گی۔
انہوں نے کہاکہ نگراں حکومت کو ٹارگٹڈ سبسڈی کی طرف جانا پڑے گا، یہ نہیں ہو سکتا کہ صرف پیٹرول کی مد میں سبسڈی دیں، سبسڈی غریب، مزدور،کسانوں کو ملنی چاہئے، سرمایہ داروں کو نہیں۔انہوں نے کہاکہ الیکشن شیڈول نہیں آیا تو ترقیاتی منصوبوں کو بھی نہیں روکا جا سکتا، مہنگائی کی وجوہات آئی ایم ایف معاہدوں کی خلاف ورزی ہے۔
