ماڈل و اداکارہ نادیہ حسین نے اپنے شوہر کے مالی فراڈ میں ملوث ہونے کی سختی سے تردید کی ہے اور کہا ہے کہ ان کا اس معاملے سے کوئی تعلق نہیں۔
نادیہ حسین اپنی قانونی ٹیم کے ہمراہ ایف آئی اے میں پیش ہوئیں جہاں انہوں نے واضح مؤقف اختیار کیا کہ انہوں نے اپنے تمام مالی معاملات قانونی طریقے سے ظاہر کیے ہیں، اور کسی بھی غیر قانونی سرگرمی میں شریک نہیں رہیں۔
اداکارہ نے تسلیم کیا کہ شوہر نے ان کے بزنس میں سرمایہ کاری کی تھی، لیکن وہ سرمایہ کہاں سے آیا، یہ ان کے علم میں نہیں۔ ان کے مطابق ان کی ٹیکس ریٹرنز مکمل اور شفاف ہیں۔
دوسری جانب ایف آئی اے کی تحقیقات میں بتایا گیا کہ مبینہ فراڈ کی رقم میں سے 2 کروڑ روپے ان کے سیلونز کے اکاؤنٹس میں منتقل ہوئے، جس پر انہیں بھی پوچھ گچھ کے لیے طلب کیا گیا۔
نادیہ حسین کو سوشل میڈیا پر سخت تنقید کا بھی سامنا ہے۔
