میں نے تمہیں پہلی بار اس لمحے سوچا جب میری آنکھوں نے افق کی خاموشی میں روشنی تلاش کی تھی

تحریر : کاشف جاوید
میں نے تمہیں پہلی بار اس لمحے سوچا جب میری آنکھوں نے افق کی خاموشی میں روشنی تلاش کی تھی تم شاید کسی شہر کی کھڑکی سے باہر جھانک رہی ہوگی اور میں کسی لائبریری میں کانٹ کے "نقلی جنتوں” پر نشان لگاتے ہوئے سوچ رہا تھا کہ سچ کیا ہے حسن کیا ہے اور یہ ادراک کا لمحہ کیوں اتنا مختصر ہوتا ہے اس لمحے مجھے رومی کی وہ بات یاد آئی کہ "جو تم ڈھونڈ رہے ہو وہ بھی تمہیں ڈھونڈ رہا ہے” اور میں ٹھہر گیا جیسے کوئی سوال کسی جواب کے احترام میں خاموش ہو جاتا ہے
میں تمہیں لکھنا نہیں چاہتا تھا کیونکہ تم لکھنے کے قابل نہیں ہو تم تو صرف محسوس کیے جانے کے لیے ہو جیسے برگساں کے ہاں وقت کوئی ساعت نہیں بلکہ ایک بہاؤ ہے تم بھی میرے شعور میں اسی طرح بہتی آئی ہو کبھی ہیگل کی جدلیات کی طرح جو ہر تضاد میں ایک نیا حسن پیدا کرتی ہے اور کبھی ویرانی میں اُترتی ہوئی وہ شاعری بن کر جو میر نے "دل کے اُجڑنے” کے بعد لکھی تھی تمہیں پڑھنا ایک ایسا تجربہ ہے جیسے کوئی وین گوہ کی پینٹنگ کو چکھنے کی کوشش کرے
کیا تم نے کبھی خود سے پوچھا ہے کہ محبت ایک خیال ہے یا ضرورت کیا یہ امکان ہے یا محض ایک خواہش تم شاید یونگ کے تصورِ "انِیما” سے واقف ہو وہ کہتا تھا کہ ہر مرد کے اندر ایک نسوانی سایہ ہوتا ہے جو اسے مکمل کرتا ہے تم وہی سایہ ہو جو میری ذات کو اپنے معنی دے رہا ہے اور شاید میں بھی تمہارے اندر وہ مفقود عکس ہوں جسے تم نے ہر عکس میں ڈھونڈا مگر کہیں نہ ملا اسی لیے شاید میری خاموشی تمہیں زیادہ بولتی لگتی ہے اور میرا فاصلہ زیادہ قریب
تم کہو گی یہ سب تمہارے لیے لکھا گیا ہے لیکن دراصل یہ تمہارے وسیلے سے ان سب عورتوں کے لیے ہے جنہوں نے کبھی خود کو سمجھنے کی جسارت کی جنہوں نے کبھی فیمنزم کو محض ایک نعرہ نہیں بلکہ ایک فلسفہ سمجھا جنہوں نے ورجینیا وولف کے "اپنا کمرہ” کی تنہائی کو اپنے آنچل میں سمیٹا اور سیمون دی بوار کی آنکھوں میں جھانک کر کہا کہ ہم "دوسری جنس” نہیں ہم پہلا سوال ہیں
اگر کبھی تم نے سنا ہے کہ شیکسپیئر کا ہیملٹ پاگل تھا تو یاد رکھنا وہ پاگل نہیں تھا وہ صرف اپنے زمانے سے زیادہ حساس تھا جیسے تم ہو جیسے میں ہوں تمہیں شاید معلوم ہو کہ ٹالسٹائی نے "انا کارینینا” اس لیے لکھی کہ وہ عورت کو "اخلاقی گناہ” سے نکال کر "وجودی سچائی” میں رکھنا چاہتا تھا اور شاید میں بھی تمہیں انہی سچائیوں میں رکھنا چاہتا ہوں جہاں تم میرے الفاظ میں نہیں بلکہ اپنے سوالات میں محفوظ ہو جاؤ
میں تمہیں کبھی یہ نہیں کہوں گا کہ تم خوبصورت ہو کیونکہ خوبصورتی ایک فانی تمثیل ہے میں تو صرف یہ چاہتا ہوں کہ جب تم خود کو آئینے میں دیکھو تو تمہارے چہرے پر وہی خاموشی ہو جو پیکاسو کی "گرنیکا” میں ہے ایک چیخ جو سنائی نہیں دیتی لیکن آنکھ میں رہ جاتی ہے میں چاہتا ہوں تم وہ فن پارہ بنو جسے دنیا سمجھے بغیر دیکھتی رہے اور صرف وہی دیکھ پائے جو خود بھی ادھورا ہو
کبھی کبھی مجھے لگتا ہے تمہارا وجود خود ایک سوال ہے جسے ارسطو نے کبھی پوچھا تھا لیکن زمانہ اس کے جواب سے خائف ہو گیا تمہاری آنکھوں میں وہی التباس ہے جو کیرکیگارڈ کے "خوف اور لرزہ” میں تھا اور تمہاری چپ ویسی ہے جیسے کوئی درویش خدا سے شکایت کرتے ہوئے بھی ادب کی حد سے باہر نہ جائے تمہارے لفظوں میں وہی تاثیر ہے جو مولانا روم کی چپ میں تھی جب وہ شمس کے ہجر میں خاموش ہو گیا تھا
اگر کبھی میں تمہیں محبت کروں تو وہ عشقِ مجازی نہیں ہوگا وہ وہی "محبتِ حقیقی” ہو گی جو ابنِ عربی کے وجود کے وحدت سے جنم لیتی ہے کیونکہ میرے لیے عشق کوئی افسانہ نہیں بلکہ وہ کیفیت ہے جس میں "میں” اور "تو” کی تمیز مٹ جاتی ہے جہاں ہستی ایک رقص بن جاتی ہے اور خدا خود ایک سوال بن کر میرے دل میں بیٹھ جاتا ہے
میں تمہیں اپنی بانہوں میں قید نہیں کرنا چاہتا میں تو صرف یہ چاہتا ہوں کہ تم میرے الفاظ کی دیوار پر اپنی ہتھیلی رکھ کر محسوس کرو کہ کسی نے تمہیں صرف دیکھا نہیں تمہیں پڑھا بھی ہے اور اگر کبھی کسی شام تم نے یہ سطور اپنے دل کے کمرے میں بیٹھ کر پڑھی تو تم جان لو کہ یہ تحریر تمہارے حسن سے زیادہ تمہارے وجود کی تلاش کا آئینہ ہے
اور اگر یہ سب پڑھ کر تمہیں محسوس ہو کہ تم مجھ میں نہیں بلکہ خود میں گم ہو رہی ہو تو یہ جان لو کہ یہی میرا فن تھا یہی میرا فلسفہ یہی میرا عشق کہ میں تمہیں تمہارے اندر واپس لے آؤں اور جب تم پلٹ کر میرے نام کو دیکھو تو تمہاری آنکھوں میں وہ خاموشی ہو جو محبت نہیں بلکہ شعور پیدا کرتی ہے
نوٹ: لکھاریوں کےذاتی خیالات سے”قلم کلب”کامتفق ہوناضروری نہیں ہے۔