لاہور(ایجوکیشن رپورٹر)صوبائی وزیر تعلیم رانا سکندر حیات نے میٹرک امتحانات کے دوران بوٹی مافیا کو ایک بار پھر خبردار کر دیا، وزیر تعلیم نے ملوث افراد کو سخت سزاﺅں، خود فالو اپ کرنے کا عندیہ دے دیا۔
وزیرتعلیم رانا سکندر حیات نے اپنے ایک بیان میں کہا ہے کہ بوٹی مافیا کو کنٹرول کرنا مشن ہے، کسی کو کسی کے نمبرز نہیں چھیننے دیں گے، امتحانات شفاف بنانے کیلئے موثر اقدامات اٹھائے گئے ہیں، اب کوئی کسی طالبعلم کا متبادل نہیں ہو سکے گا، نہ حق مار سکے گا۔
انہوں نے کہا کہ تمام امتحانی مراکز کی نگرانی کیمرے کی آنکھ سے بھی ہو رہی ہے، اس مرتبہ پرائیویٹ سٹاف بطور امتحانی عملہ تعیناتی کی اجازت نہیں دی گئی، پرائیویٹ امتحانی سنٹرز کی تعداد میں بھی خاطر خواہ کمی لائی گئی ہے۔وزیر تعلیم کا مزید کہنا تھا کہ مانیٹرنگ کیلئے خصوصی سکواڈ تشکیل دے دئیے گئے ہیں، چیف سیکرٹری، کمشنرز، ڈی سیز، سیکرٹریز، چیئرمین ٹاسک فورس خود بھی سنٹرز میں چھاپے ماریں گے۔
