میانمار اور تھائی لینڈ میں تباہ کن زلز لہ، ہلاکتوں کی تعداد 1000 سے تجاوز کر گئی

نیپئیڈاﺅ،بنکاک،اسلام آباد (انٹرنیشنل نیوز )میانمار اور تھائی لینڈ میں آنے والے تباہ کن زلزلے سے ہلاک ہونے والوں کی تعداد 1ہزار سے تجاوز کر گئی جبکہ ہلاکتوں میں مزید اضافے کا خدشہ ہے ۔

بڑی بڑی عمارتیں ملبے کا ڈھیر بن گئیں۔عالمی میڈیارپورٹس کے مطابق گزشتہ روز آنے والے 7.7 شدت کے زلزلے کے جھٹکوں کے باعث تباہ ہونے والی عمارات، مکانوں اور دیگر کے ملبے تلے دب کر ہلاک ہونے والے افراد کی تعداد1002سے زائد ہو گئی ہے جبکہ زخمیوں کی تعداد 2 ہزار 376 تک پہنچ گئی ہے۔ شہر ماندالے اور رنگون میں بجلی معطل ہے اور انٹرنیٹ سروس بھی متاثر ہے۔

اب بھی کچھ لاپتہ افراد کی تلاش جاری ہے۔ ۔ زلزلے کے جھٹکے کے اثرات تھائی لینڈ کے دارالحکومت بنکاک میں بھی محسوس کیے گئے تھے جس سے فلک بوس عمارتیں چند لمحوں میں ملبے کا ڈھیر بن گئیں۔ رپورٹ میں ان سانئنسی نکات کی نشاندہی کی ہے جن کی وجہ سے یہ علاقہ جھٹکوں کی زد میں آیا اور مجموعی طور پر نقصان بھی زیادہ ہوا۔میانمار زمین کی دو ٹیکٹونک پلیٹس کے درمیان اس جگہ پر واقع ہے جہاں دونوں پلیٹس آپس میں ملتی ہیں اور یہ وہ پلیٹس ہیں جن کو دنیا کی سب سے زیادہ ایکٹیو پلیٹس سمجھا جاتا ہے لیکن اس کے باوجود اس علاقے میں شدید اور تباہ کن زلزلے نسبتا کم آتے رہے ہیں۔

زمینی ساخت کے ماہر اور لندن یونیورسٹی سے وابستہ پروفیسر جونا فور والکر کا کہنا ہے کہ انڈین اور یوریشیا کی زیرزمین پلیٹس جہاں پر آپس میں ملتی ہیں وہ علاقہ میانمار کے شمال جنوبی حصے میں واقع ہے۔ان کا مزید کہنا تھا کہ یہ پلیٹس افقی طور پر ایک دوسرے سے جڑی ہیں جن میں کبھی کبھی حرکت پیدا ہوتی ہے جو زلزلوں کا باعث بنتی ہے جو عموما سبڈکشن زونز کی نسبت کم شدت رکھتے ہیں جیسا کہ سماٹرا، جہاں ایک پلیٹ دوسری کے نیچے ہوتی ہے اور وہاں سات سے آٹھ شدت کے زلزلے آ سکتے ہیں۔

میانمار وہ ملک ہے جہاں حالیہ کچھ برسوں میں کئی زلزلے آئے جن میں 2012 میں آنے والا چھ اعشاریہ آٹھ کا زلزلہ بھی شامل تھا جس میں 26 ہلاکتیں ہوئیں اور درجنوں افراد زخمی ہوئے۔ماہرِ ارضیات یو سی ایل سے وابستہ بل میک گوئر کا کہنا ہے کہ جمعے کو آنے والے زلزلے کو صدی کا اب تک کا شدید ترین زلزلہ قرار دیا جا رہا ہے۔ اسی طرح ایک برٹش جیولوجیکل سروے ڈیپارٹمنٹ سے منسلک ماہرِ ارضیات روجر مسن نے خبررساں ادارے کو بتایا کہ زلزلے کی گہرائی جتنی کم ہو گی تو نقصان زیادہ ہو گا اور امریکی سروے ڈیپارٹمنٹ کے مطابق اس زلزلے کا مرکز زمین کی صرف 10 کلومیٹر تک کی گہرائی میں تھا۔

ان کے مطابق میانمار اور تھائی لینڈ میں آنے والا زلزلہ اسی لیے زیادہ تباہ کن تھا کیونکہ اس کی گہرائی کم تھی اور جھٹکوں سے زمین زیادہ شدت سے ہل کر رہ گئی اور کافی تعداد میں اونچی عمارتیں متاثر ہوئیں۔انہوں نے وضاحت کی کہ ضروری نہیں کہ مرکز پر توجہ مرکوز کی جائے کیونکہ لہریں وہاں سے نہیں نکلتیں جہاں زلزلے کا مرکز ہوتا ہے بلکہ فالٹ لائن اور اردگرد کے قریبی ایریاز سے خارج ہوتی ہیں۔

امریکی جولاجیکل سروے کا کہنا ہے کہ مرنے والوں کی تعداد 10 ہزار سے ایک لاکھ تک پہنچ سکتی ہے اور معیشت پر اس کے منفی اثرات مرتب ہونے کا امکان ہے۔ دوسری جانب میانمار اور تھائی لینڈ میں زلزلے کے بعد پاکستانی شہریوں کی مدد کے لیے سفارتخانے الرٹ ہوگئے۔پاکستانی سفارتخانے یانگون اور بینکاک میں ہنگامی صورتحال میں معاونت فراہم کریں گے جبکہ وزارت خارجہ میں کرائسز منیجمنٹ یونٹ فعال کردیا گیا ہے۔ علاوہ ازیں پاکستانی شہریوں کی ہنگامی مدد کے لیے وزارت خارجہ نے نمبرز بھی جاری کردئیے ہیں۔