وزیر دفاع خواجہ آصف نے انکشاف کیا ہے کہ بھارت پاکستان مخالف دہشتگرد تنظیموں کو اسلحہ و ساز و سامان فراہم کر رہا ہے تاکہ ملک میں افراتفری پیدا کی جا سکے۔ ان کا کہنا تھا کہ یہ تنظیمیں، جو بھارت کی پشت پناہی سے سرگرم ہیں، سندھ اور پنجاب سمیت مختلف علاقوں میں خوف کی فضا قائم کرنے کی کوششوں میں مصروف ہیں۔
انہوں نے دعویٰ کیا کہ بھارت فرضی تنظیموں کے نام استعمال کر کے کارروائیوں کی ذمہ داری کسی اور پر ڈالنے کی پرانی حکمتِ عملی اپنا رہا ہے، جیسا کہ ماضی میں پلوامہ واقعے میں دیکھا گیا۔
خواجہ آصف کا کہنا تھا کہ پاکستانی سلامتی ادارے ہر خطرے سے نمٹنے کے لیے مکمل طور پر تیار ہیں اور کسی بھی مہم جوئی کا منہ توڑ جواب دیا جائے گا۔
ادھر اسحاق ڈار نے بھی بھارت کو خبردار کرتے ہوئے کہا کہ اگر کوئی جارحیت کی گئی تو پاکستان سفارتی اور دفاعی سطح پر سخت ردعمل دے گا۔ انہوں نے یہ بھی واضح کیا کہ پاکستان کے پاس بلوچستان میں را کی سرگرمیوں کے ٹھوس شواہد پہلے سے موجود ہیں۔
