لاہور(نمائندہ خصوصی)گورنر پنجاب محمد بلیغ الرحمن نے حال ہی میں خانیوال کے قریب دہشت گردوں کی فائرنگ سے شہید ہونے والے حساس ادارے کے افسران کو خراج عقیدت پیش کرتے ہوئے کہا ہے کہ ہماری سکیورٹی فورسز اورافواج پاکستان دہشت گردی کے خلاف جوقربانیاں دے رہے ہیں ان کا خون رائیگاں نہیں جائے گا۔
انہوں نے کہا کہ دہشت گردی کو جڑ سے اکھاڑ پھینکنے میں عسکری اور سیاسی قیادت کے ساتھ ساتھ پوری قوم ایک پیج پر کھڑی ہے۔گورنر پنجاب نے دہشت گردی کے واقعے میں شہید ہونے والے افسران کے لئے دعا کی ہے کہ اللہ تعالی انہیں جنت الفردوس میں جگہ عطا فرمائے اور لواحقین کو یہ صدمہ صبر و استقامت کے ساتھ برداشت کرنے کا حوصلہ دے۔علاوہ ازیں گورنر پنجاب محمد بلیغ الرحمن سے گورنر ہائوس لاہور میں سابق صوبائی وزرا اور اراکین اسمبلی کے وفود نے ملاقات کی۔
ملاقات کرنے والوں میں ممبران قومی و صوبائی اسمبلی رانا مشہود احمد خان ،خواجہ عمران نذیر ، نواب شیر وسیر ، ملک محمد ریاض، میاں فدا حسین وٹو، رانا عبدالروف غزالی سلیم بٹ ،حنا پرویز بٹ سمیرا کومل، فیصل حیات جبوانہ اور مفتی انتخاب عالم نوری شامل تھے ۔اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ ملک کو ڈیفالٹ کرنے کا جھوٹا پروپیگنڈہ کرنے والوں کو ندامت کا سامنا کرنا پڑے گا۔انہوں نے کہا کہ اتحادی حکومت کی مثبت پالیسیوں کے باعث ملک میں معاشی استحکام آنا شروع ہو گیا ہے ۔
انہوں نے کہا کہ ملک کو معاشی طور مستحکم کرنا حکومت کی اولین ترجیح ہے۔ گورنر پنجاب نے کہا کہ وزیراعظم محمد شہباز شریف اور ان کی اقتصادی ٹیم ملک کو معاشی بحران سے نکالنے کے لیے شب و روز محنت کر رہی ہے۔انہوں نے کہا کہ اتحادی حکومت کی کوششوں کی وجہ سے ہمارے دوست ممالک نے معاشی بحران سے نمٹنے کیلئے اپنے بھرپور تعاون اور مدد کا عندیہ دیا ہے جو کہ ایک مثبت پیش رفت ہے۔ گورنر پنجاب محمد بلیغ الرحمن نے کہا کہ وزیراعلی پنجاب کو آئین و قانون کے مطابق اعتماد کا ووٹ لینے کا کہا ہے ۔ انہوں نے کہا کہ وزیر اعلی کو اعتماد کا ووٹ لینا پڑے گا کیونکہ یہ ایک آئینی تقاضا ہے بصورت دیگر انہیں وزارت اعلی کے منصب سے محروم ہونا پڑے گا۔
