لاہور (نمائندہ خصوصی)گورنر پنجاب محمد بلیغ الرحمن سے یہاں گورنر ہائوس لاہور میں سابق سپیکر پنجاب اسمبلی رانا محمد اقبال نے ملاقات کی۔
ملاقات کے دوران ملکی سیاسی صوتحال سمیت مختلف امور پر تبادلہ خیال کیا گیا ۔اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ عوام کی فلاح وبہبود اور انہیں بنیادی سہولتوں کی فراہمی حکومت کی ترجیح ہے۔ انہوں نے کہا کہ ملک کو اس وقت معاشی سمیت مختلف چیلنجز کا سامنا ہے جس سے نمٹنے کے لئے حکومت بھر پور کوشش کررہی ہے ۔ گورنر پنجاب نے کہا کہ مسلم لیگ(ن)نے اپنے سابقہ ادوار میں مہنگائی کو ختم کرنے پر خصوصی توجہ دی اور ان ادوار میں مہنگائی کی شرح بہت کم تھی۔
اب بھی حکومت کی دانشمندانہ پالیسیوں کے باعث ملک کے معاشی حالات میں بہتری آنا شروع ہوگئی ہے۔ انہوں نے کہا کہ وفاقی حکومت نے مشکل معاشی صورتحال کے باوجود بہت اچھا اورعوام دوست بجٹ پیش کیا ہے۔گورنر پنجاب نے کہا کہ حکومت کا حالیہ بجٹ میں کسانوں کے لیے قرضے اور پیکجز کا اعلان احسن اقدام ہے۔انہوں نے مزیدکہا کہ اس دفعہ گندم کی اچھی منافع بخش فصل کسی نعمت سے کم نہیں۔ گورنر پنجاب نے اس موقع پر یونان میں ہونے والے کشتی حادثے پر گہرے دکھ کا اظہار کرتے ہوئے کہا کہ یہ ایک سانحہ ہے اور جن کے پیارے اس حادثے میں جاں بحق ہو گئے ہیں وہ جس اذیت اور کرب سے گزر رہے ہیں وہ ناقابل بیان ہے۔
انہوں نے کہا کہ یہ ایک المناک واقعہ ہے اور دکھ کی اس گھڑی میں میری دعائیں اور تمام تر ہمدردیاں متاثرہ خاندانوں کے ساتھ ہیں۔ انہوں نے دعا کی کہ اللہ تعالی مرحومین کو اپنے جوار رحمت میں جگہ عطا فرمائے اور لواحقین کو یہ صدمہ صبر و استقامت کے ساتھ برداشت کرنے کا حوصلہ دے۔سابق سپیکر پنجاب اسمبلی رانا محمد اقبال نے کہا کہ مسلم لیگ(ن)کی قیادت اور کارکنان نے ہمیشہ مثبت سیاست کی ہے۔انہوں نے کہا کہ آنے والے عام انتخابات میں مسلم لیگ (ن)انشا اللہ بھاری اکثریت سے کامیابی حاصل کرے گی۔
