لاہور(نمائندہ خصوصی)پاکستان مسلم لیگ (ن) کے سینئر رہنما و سابق وفاقی وزیر میاں جاوید لطیف نے کہا ہے کہ ملک میں سازشیوں کو توڑے بغیر مسائل ٹھیک نہیں ہوں گے ،ملک اور ریاست کے خلاف سازشوں کو بے نقاب کرنا ہو گا، 16ماہ کی حکومت میں ہم بے اختیار تھے،
ہمارے دور میں آٹھ ماہ وہی کردار بر سر اقتدار رہے جن کی ہم نشاندہی کرتے رہے ہیں اور اس کے ثبوت 9،10مئی کے واقعات میں سامنے بھی آئے ، خود احتسابی کے عمل میں یہی کردار سہولت کار نکلے ،عدلیہ کے ماضی کے فیصلوں نے ملک کو آج اس نہج پر پہنچا یاہے، یہ ذہن سے نکال دیں نواز شریف واپس نہیں آئیں گے ، نواز شریف آئیں گے اور آرہے ہیں ۔ ان خیالات کا اظہار انہوں نے لاہور پریس کلب میں پریس کانفرنس کرتے ہوئے کیا ۔
میاں جاوید لطیف نے کہا کہ نواز شریف نے ملک سے بدامنی ختم کی اور 2013میں آکر ملک میں بجلی پیدا کی،مہنگائی اور بجلی کی قیمتوں کا ملبہ صرف مسلم لیگ (ن)پر ہی نہیں ڈالا جاسکتا،اس وقت ملک بھر میں جو بجلی کے بلوں کا رونا رویا جا رہا ہے،مہنگائی کا سیلاب عوام کو کھا رہا ہے جب تک ان عوامل کے پیچھے سازش کو بے نقاب نہیں کیا جائے گا معاملات ٹھیک نہیں ہونگے ۔
انہوں نے کہا کہ 16ماہ کی حکومت نے ملکی مسائل حل کرنے کی بھر پور کوشش کی،پونے چار سال جنہوں نے حکومت کی ان کا قصور بھی توقوم کے سامنے لائیں،یہ نہیں ہوسکتا کہ کوئی دوسرا مفت بجلی استعمال کرے اور عوا م اسے بھگتیں۔جنہوں نے پاکستان میں سول نافرمانی کی سازش کی ان تک پہنچنا ہوگا ۔
جنہوں نے پونے چار سال حکومت کی اور اداروں سے معاہدے کئے عوام کو ان کا بھی پتہ ہونا چاہیے ۔آئی پی پیز معاہدے کن سے کئے اور ڈالروں میں ادائیگی کی اس کو سامنے لایا جائے ۔انہوں نے کہا کہ آج ہر گھر میں عدم استحکام بڑھ رہا ہے، ملک بھر میں بجلی کے بلوں کا رونا رویا جا رہا ہے، بجلی کے بلوں میں دو چار روپیہ یونٹ کم کرنے سے معاملہ ٹھیک نہیں ہوگا،بجلی کے بل کم کرنے سے عدم استحکام اور افراتفری نہیں رکے گی،
اس سازش کے پیچھے چھپے ذمے داروں کو سامنے لانے تک ملک میں استحکام نہیں آئے گا۔انہوں نے کہا کہ پی ٹی آئی چیئرمین حکومت سے ہٹا تو 2500 ارب کے گردشی قرضے چھوڑ کر گیا تھا جسے قوم کسی طور پر معاف کرنے کو تیار نہیں ۔2007سے 2013تک بجلی دیکھنے کو نہیں ملتی تھی،ملک میں دہشتگردی تھی اور دس سے بیس لوگ اکٹھے نہیں ہوسکتے تھے،نواز شریف نے 2013 میں آکر سستی اور وافر بجلی پیدا کی ،دہشتگردی ختم کی جس کی پوری قوم گواہ ہے ۔ملک کے محسن کے ساتھ جو سلوک کیا گیا اس پر فیصلہ ہونا چاہیے ۔
انہوں نے کہا کہ ملک میں سازشیوں کو توڑے بغیر مسائل ٹھیک نہیں ہوں گے ۔جاوید لطیف نے کہا کہ انصاف دینے والی قابل احترام شخصیت قاضی عیسیٰ کے خلاف ریفرنس دائر کر دیا گیا، آج کہا جا رہا ہے نواز شریف پاکستان آئیں اور قانون کا سامنا کریں، کیا ذوالفقار علی بھٹو سے انصاف ہوا تھا، کیا نواز شریف کیخلاف سازش کرنے والے کردار بے نقاب ہو چکے ہیں، آپ آج بھی ان کرداروں کو عدالت کے کٹہرے میں کھڑا کرنے کو تیار نہیں۔
ملک کے خلاف سازش کرنے والوں کو عوام کے سامنے لانا ریاستی اداروں کے سربراہان کی ذمے داری ہے، 2017 کے کرداروں کو بھی عوام کے سامنے لایا جائے۔نواز شریف پاکستان آئیں گے اور الیکشن مہم چلائیں گے ۔انہوںنے کہا کہ کسی کے جیل میں جانے یا آنے سے (ن) لیگ کو کوئی فرق نہیں پڑتا۔
انہوں نے کہا کہ آپ جڑانوالہ واقعے میں مذہبی سازشوں کو بے نقاب کر سکتے ہیں، اسی طرح ملک اور ریاست کے خلاف سازشوں کو بے نقاب کرنا ہو گا۔انہوں نے کہا کہ ریاست کو نقصان پہنچانے والے فیصلوں کو عوام کے سامنے لانا ہو گا، 75سال میں آج تک ملک میں اتنی درخواستیں کسی کے لیے عدالتوں میں نہیں گئیں۔
