سکھر (نمائندہ خصوصی)وفاقی وزیر آبی وسائل سیدخورشید شاہ نے کہا ہے کہ ملک میں حالات بدتر ہوتے جارہے ہیں اس میں کوئی شک نہیں ہے۔
وفاقی وزیر خورشید شاہ نے پنوعاقل میں جلسے سے خطاب کرتے ہوئے کہا کہ سابقہ حکومت نے ملک کا بیڑا غرق کیا، ہمارے ملک کو جان بوجھ کر غریب بنایا گیا ملک غریب نہیں ہے۔
انہوں نے کہا کہ دنیا کے کئی ممالک کی ترقی کوئلے پر ہوئی ہے، ہمارے پاس کوئلہ نکلا لیکن ہمارے ہی لوگوں نے اس پراجیکٹ کو رکوایا، ہمارے ملک کو غریب کرنے والے اپنے ہی لوگ ہیں۔خورشید شاہ نے کہا کہ 2025 میں ہمارے پروجیکٹ شروع ہوئے تو ہم 15 روپے یونٹ بجلی دیں گے، گیس اور کوئلے پر کام کیا تو پہاڑوں پر رہنے والے لوگوں کو بھی روزگار مل جائے گا۔وفاقی وزیر نے کہا کہ آپ پاکستان سے مایوس نہ ہوں، ہمارے پاس بہت کچھ ہے، بیرونی ممالک کی ترقی کوئلے کی وجہ سے ہوئی، لیکن ہم نے سندھ سے نکلنے والے کوئلے سے فائدہ نہیں اٹھایا۔
انہوں نے مزید کہا کہ ہم نے گیس کا معاہدہ کیا لیکن وہ رکوایا گیا، مایوس نہ ہوں کوئلے سے بجلی بنانے سے بجلی کی کمی پوری ہوگی۔
