کراچی (شوبز رپورٹر)پاکستان شوبز انڈسٹری کی معروف اداکارہ یمنی زیدی کی ڈیبیو فلم نایاب نام یاد رکھنا کی کامیابی کا سفر ایک سال بعد بھی جاری ہے۔
گزشتہ برس کانز فلم فیسٹیول میں 2 اعزاز اپنے نام کرنے والی اس فلم نے اب سائوتھ ایشین انٹرنیشنل فلم فیسٹیول فلوریڈا میں بھی 2 اعزازات حاصل کر لیے۔سائوتھ ایشین انٹرنیشنل فلم فیسٹیول فلوریڈا نے بہترین فیچر فلم کے اعزاز کے لیے نایاب نام یاد رکھنا کو چن لیا جبکہ اس فلم کی مرکزی اداکارہ یمنی زیدی نے بھی بہترین اداکارہ کا اعزاز اپنے نام کر لیا۔
واضح رہے کہ گزشتہ برس 26 جنوری کو ریلیز ہونے والی اس فلم کی کہانی کرکٹ کے گرد گھومتی ہے، یہاں کرکٹ صرف کھیل نہیں بلکہ زندگی ہے۔
یہ فلم رومینہ عمیر اور عمیر عرفانی کی پیشکش ہے، اس کا اسکرین پلے علی عباس نقوی اور باسط نقوی نے لکھا ہے۔اداکارہ یمنی زیدی کے علاوہ فلم کی کاسٹ میں اداکار جاوید شیخ، عدنان صدیقی، محمد فواد خان، عثمان خان، احتشام الدین، فریال محمود، امِ ہانی طہ سمیت دیگر شامل ہیں۔
