لاہور(نیوز رپورٹر )صوبائی وزیر اطلاعات عظمی بخاری نے کہا ہے کہ مریم نواز کی بڑھتی مقبولیت سے کچھ لوگ خوفزدہ ہیں۔اپنے ایک بیان میں عظمی بخاری کا کہنا تھا کہ مریم نواز اپنی کارکردگی سے لوگوں کے دلوں میں جگہ بنا رہی ہیں، جن کو مریم نواز کے ساتھ مقابلے کا شوق ہے وہ ان کے جیسی کارکردگی بھی دکھائیں۔
انہوں نے کہا کہ پنجاب کی تاریخ میں مریم نواز پہلی وزیراعلی ہیں جنہوں نے 80 سے زیادہ منصوبے ایک سال میں شروع کیے، مریم نواز کی حکومت 50 سے زیادہ منصوبے مکمل کر چکی ہے، باقی حکومتوں کے ترجمانوں کا کام صرف پنجاب کے منصوبوں میں کیڑے نکالنا ہے۔
عظمی بخاری کا کہنا تھا کہ مریم نواز اپنے طرز حکومت اور گڈ گورننس کی وجہ سے باقی صوبوں میں بھی مقبول ہو رہی ہیں، مریم نواز کی بڑھتی ہوئی مقبولیت سے کچھ لوگ خوفزدہ ہیں، جب آپ مسلسل کئی سالوں سے اقتدار میں رہنے کے بعد بھی ڈلیور نہیں کریں گے تو لوگ کام کرنے والی وزیراعلی کو ہی پسند کریں گے۔صوبائی وزیر نے مزید کہا کہ میاں نواز شریف کی لیڈرشپ میں وفاق اور پنجاب کی حکومتیں کارکردگی کی نئی مثالیں قائم کر رہی ہیں، 2025 پاکستان کی ترقی اور خوشحالی کا سال ہوگا۔
