اسلام آباد (نمائندہ خصوصی)پاکستان مسلم لیگ (ن) کی سینئر نائب صدر اور چیف آرگنائزر مریم نواز خیبرپختونخوااور ہزارہ کی خواتین کی مرکز نگاہ بن گئیں ،
تنظیمی دورے پر ایبٹ آباد آمد پر خطے کی پڑھی لکھی، پروفیشنلز اور گھریلو خواتین کی بڑی تعداد ملاقات کے لئے امڈ آئی ،مریم نوازسے ملاقات کے لئے آنے والی خواتین میںبزنس ویمن، اساتذہ، ڈاکٹرز، سٹوڈنٹس اور دیگر شعبہ جات سے وابستہ خواتین شامل تھیں ۔مریم نواز کی جانب سے مختلف شعبہ ہائے زندگی سے تعلق رکھنے والی خواتین کے ساتھ خوشگوار ماحول میں طویل نشست ہوئی ۔ خواتین نے کہاکہ ہم بڑی خوشی ہے کہ آپ نے سیاست میں خواتین کی حوصلہ افزائی کی بات کی ہے۔ انہوںنے کہاکہ ہم چاہتے ہیں کہ خواتین مردوں کے معاشرے میں فیصلہ سازی میں اپنا کردار بڑھ چڑھ کر ادا کریں۔
ہزارہ موٹر وے بنانے پر خواتین نے نوازشریف کو خراج تحسین پیش کیا اور رٹی کا سینئر نائب صدر اور چیف آرگنائزر بننے پر مریم نوازکو مبارک دی ۔ مریم نواز نے گفتگو کرتے ہوئے کہاکہ موجودہ حالات کو ٹھیک کرنے کے لئے مائوں، بہنوں، بیٹیوں کو آگے آنا ہوگا۔مریم نواز نے کہاکہ اپنی آنے والی نسلوں کے مستقبل کی سب سے زیادہ فکر ماں کو ہوتی ہے۔مریم نواز نے کہاکہ آپ کے ساتھ مل کر ایک ماں ، بہن اور بیٹی والے جذبے سے پاکستان کو سنواریں گے۔ انہوںنے کہاکہ چاہتے ہیں کہ جس طرح پنجاب میں خواتین کو بااختیار بنایا، خیبرپختونخواہ اور ہزارہ میں بھی ایسے اقداما ت کریں۔
انہوںنے کہاکہ خواہش کے یہاں بھی بہترین ہسپتال اور سکول بنیں۔مریم نواز نے کہاکہ پاکستان مسلم لیگ (ن) کی خواتین رہنماؤں اور کارکنان نے ہر دور میں جرات و بہادری کا بے مثال مظاہرہ کیا ہے۔مریم نواز نے کہاکہ مسلم لیگ (ن) کی خواتین کے جذبے، قربانیوں اور پارٹی سے وفا کو سلام پیش کرتی ہوں۔ مریم نواز نے کہاکہ خوش قسمتی ہے کہ آپ کے ساتھ مل کر کام کرنے کا موقع ملا۔ انہوںنے کہاکہ میری گرفتاری اور سیاسی جدوجہد میں خواتین نے بھرپور ساتھ دیا، یہ محبت بھول نہیں سکتی۔ مریم نواز نے کہاکہ پارٹی کی ماؤں، بہنوں، بیٹیوں کے ساتھ مضبوط رشتہ بن چکا ہے، مل کر ایک بھرپور سیاسی قوت بنیں گے
