اسلام آباد(نیوز رپورٹر)وفاقی وزیر داخلہ محسن نقوی نے پوری قوم سمیت امت مسلمہ کو رمضان المبارک کی مبارکباد دیتے ہوئے کہا ہے کہ رمضان کا مقدس مہینہ ہمیں تقوی، صبر اور برداشت سکھاتا ہے،عبادات کیساتھ قومی یکجہتی، اتحاد اور بھائی چارے کو فروغ دینا ہوگا۔
ہفتہ کو وزارت داخلہ سے جاری بیان کے مطابق محسن نقوی نے کہا کہ تمام مسلمانوں کو ماہ رمضان کی آمد پر دل کی گہرائیوں سے مبارکباد دیتا ہوں، رمضان کا مقدس مہینہ ہمیں تقوی، صبر اور برداشت سکھاتا ہے۔آئیں رمضان میں صبر، برداشت اور بھائی چارے کو فروغ دیں۔ غریبوں اور مستحقین کی مدد کریں اور عبادات کے ساتھ قومی یکجہتی، اتحاد اور بھائی چارے کو فروغ دیں۔
انہوں نے کہا کہ رمضان میں غریبوں اور محتاجوں کی مدد کرنا ایک بہت بڑی عبادت ہے۔ انہوں نے کہا کہ ناجائز منافع خوری اور ذخیرہ اندوزی سے اجتناب کریں تاکہ رمضان کی برکتیں سمیٹی جا سکیں۔ انہوں نے کہا کہ روزہ انسانیت کی خدمت اور اللہ تعالی کی قربت حاصل کرنے کا بہترین ذریعہ ہے۔ دکھی انسانیت کی خدمت کرکے ہی اللہ تعالی کی خوشنودی حاصل کی جا سکتی ہے۔ انہوں نے کہا کہ اللہ تعالی سے دعا ہے کہ رمضان المبارک ہم سب کیلئے رحمت کا باعث بنے۔
