اسلام آباد (کامرس ڈیسک)ٹریڈ ڈیولپمنٹ اتھارٹی آف پاکستان(ٹی ڈی اے پی) کے اعداد و شمار سے معلوم ہوا ہے کہ مالی سال 2023ـ24میں پاکستان کی چین کو برآمدات میں چوتھے ماہ مسلسل اضافہ دیکھنے میں آیا ہے جو گزشتہ مالی سال کے اسی ماہ کے اعداد و شمار سے زیادہ ہے۔ گوادر پرو کے مطابق واضح رہے کہ اکتوبر میں پاکستان کی چین کو برآمدات کا حجم 321.3 ملین ڈالر رہا جو اکتوبر 2022 کے دوران ریکارڈ کردہ 203.3 ملین ڈالر کے مقابلے میں 58 فیصد زیادہ ہے۔
ستمبر 2023 میں پاکستان کی چین کو برآمدات 100.5 فیصد اضافے کیساتھ 350.2 ملین ڈالر تک پہنچ گئیں جو گزشتہ مالی سال کے اسی مہینے میں 174.7 ملین ڈالر تھیں۔ گوادر پرو کے مطابق اسی طرح اگست 2023 میں پاکستان کی چین کو برآمدات 211 ملین ڈالر ریکارڈ کی گئیں جو گزشتہ مالی سال کے اسی عرصے کے 116.2 ملین ڈالر کے مقابلے میں 81.6 فیصد اضافے کے ساتھ امید افزا رجحان ظاہر کرتی ہیں۔ مالی سال 2023ـ24کے پہلے ماہ جولائی میں پاکستان کی چین کو برآمدات میں 35.1 فیصد کا اضافہ ہوا جو جولائی 2022 کے مقابلے میں نمایاں اضافہ ہے جہاں برآمدات کا حجم 124.7 ملین ڈالر رہا۔
گوادر پرو کے مطابق مالی سال 2023ـ24کے پہلے چار ماہ کے دوران پاکستان کی چین کو مجموعی برآمدات 1051 ملین ڈالر رہیں جو گزشتہ مالی سال کے اسی عرصے میں 618.9 ملین ڈالر کے مقابلے میں 69 فیصد زیادہ ہیں،جولائی تا اکتوبر مالی سال 2023ـ24کے دوران دنیا بھر کے تمام ممالک کو پاکستان کی برآمدات کا حجم 9617 ملین ڈالر رہا جو گزشتہ مالی سال کے پہلے چار ماہ کے دوران ریکارڈ کیے گئے 9554 ملین ڈالر کے مقابلے میں 0.66 فیصد زیادہ ہے۔
