لیبوبو ڈول: فیشن یا فریب؟ مشی خان نے شیطانی سازش قرار دے دیا

پاکستانی اداکارہ و میزبان مشی خان نے دنیا بھر میں وائرل ہونے والی لیبوبو گڑیا کو شدید تنقید کا نشانہ بناتے ہوئے اسے "شیطانی سازش” قرار دیا ہے۔ ان کے مطابق اس قسم کی اشیاء صرف فیشن نہیں بلکہ منفی توانائیوں، بدقسمتی اور گمراہی کو دعوت دینے والے خطرناک رجحانات ہیں۔

لیبوبو ڈول، جو کہ چینی کمپنی ‘پاپ مارٹ’ کی تخلیق ہے، اپنے نوکدار دانتوں، عجیب چہرے اور جانور جیسے جسم کی وجہ سے دنیا بھر میں توجہ حاصل کر چکی ہے۔ اس خوفناک شکل کے باوجود پاکستانی شوبز ستارے جیسے سجل علی، مایا علی اور ہانیہ عامر اسے فیشن کا حصہ بنا چکی ہیں۔

مشی خان نے اس رجحان کو "بھیڑ چال” کہا اور خبردار کیا کہ صرف اس لیے کہ کوئی چیز ٹرینڈ میں ہے، اسے اختیار کرنا عقل مندی نہیں۔ انہوں نے کہا کہ اس رجحان کے پیچھے وہ قوتیں ہیں جو نوجوان نسل کو شعوری طور پر گمراہ کرنا چاہتی ہیں۔

واضح رہے کہ لیبوبو گڑیا کی قیمت 7 ہزار سے 35 ہزار روپے تک ہے اور جعلی ورژنز بھی مارکیٹ میں آ چکے ہیں۔ سوشل میڈیا پر وائرل ہونے کے بعد اس کی مانگ میں اضافہ ہوا ہے اور کمپنی کروڑوں روپے کا منافع کما چکی ہے۔