بیروت(انٹرنیشنل نیوز) لبنان کی مزاحمتی تنظیم حزب اللہ نے اپنے دو شہید رہنماﺅں سید حسن نصر اللہ اور ہاشم صفی الدین کے جنازے اور تدفین کی تاریخوں کا باضابطہ اعلان کیا ہے ۔
حزب اللہ کے موجودہ سیکرٹری جنرل، شیخ نعیم قاسم نے ایک ویڈیو بیان میں تصدیق کی کہ دونوں رہنماﺅں کی نماز جنازہ 23 فروری بروز اتوار ادا کی جائے گی۔شیخ نعیم قاسم نے کہا کہ سید حسن نصر اللہ کی شہادت کے بعد دو ماہ تک جاری رہنے والی جنگ کے باعث ان کا جنازہ عوامی سطح پر منعقد نہیں کیا جا سکا تھا، جس کی وجہ سے انہیں امانتا سپرد خاک کیا گیا تھا۔ اب حالات کے بہتر ہونے کے بعد ان کی نماز جنازہ ایک بڑے عوامی اجتماع میں ادا کی جائے گی۔
انہوں نے مزید بتایا کہ حسن نصر اللہ کے ساتھ ساتھ ان کے جانشین سمجھے جانے والے ہاشم صفی الدین کی نماز جنازہ بھی اسی روز ادا کی جائے گی۔ ہاشم صفی الدین کو حسن نصر اللہ کی شہادت کے چند روز بعد حزب اللہ کا سیکرٹری جنرل منتخب کیا گیا تھا، تاہم باضابطہ اعلان سے قبل ہی وہ بھی شہید ہوگئے تھے۔
تنظیم کے مطابق، سید حسن نصر اللہ کی تدفین بیروت میں کی جائے گی، جبکہ ہاشم صفی الدین کو ان کے آبائی علاقے دیر قانون النہر میں سپرد خاک کیا جائے گا۔یاد رہے سید حسن نصر اللہ کو اسرائیلی فوج نے گزشتہ سال 27 ستمبر کو بیروت میں حزب اللہ کے ہیڈکوارٹر پر حملہ کر کے شہید کیا تھا جبکہ ہاشم صفی الدین 23 اکتوبر کو صیہونی افواج کی شدید بمباری میں شہید ہوئے تھے۔
