لاہور ( کامرس ڈیسک) لاہور چیمبر آف کامرس اینڈ انڈسٹری نے ایک خط کے ذریعے چارٹر آف اکانومی پر تبادلہ خیال کے لیے سیاسی جماعتوں کو لاہور چیمبرآنے کی دعوت دے دی ہے۔
سیاسی جماعتوں کے سربراہان کو تحریر کردہ خط میں لاہور چیمبر کے صدر کاشف انور نے ملک کو درپیش معاشی چیلنجز پر روشنی ڈالتے ہوئے چارٹر آف اکانومی اور اقتصادی پالیسیوں میں مستقل مزاجی کی ضرورت پر زور دیا۔
انہوں نے کہا کہ معاشی چیلنجز سے نمٹنے اور پائیدار اقتصادی ترقی کے لیے ایک متفقہ نقطہ نظر ناگزیر ہے، لاہور چیمبر نے چارٹر آف اکانومی کا ایک مسودہ تیار کیا ہے تاکہ وہ ان تجاویز کو اپنے منشور میں شامل کرسکیں، اس سے معاشی پالیسیوں میں تسلسل بھی یقینی بنایا جاسکے گا۔
لاہور چیمبر کے صدرنے کہا کہ چارٹر آف اکانومی اہم اقتصادی امور پر سیاسی جماعتوں کے درمیان اتفاق رائے پیدا کرنے کے لیے ڈیزائن کیا گیا ہے، اس میں مالیاتی نظام، سرمایہ کاری کے فروغ، روزگار کے مواقع، صنعت و تجارت کی ترقی اور سماجی بہبود سمیت دیگر شعبوں کے لیے تجاویز شامل کی گئی ہیں۔ انہوں نے کہا کہ سیاسی جماعتوں کے سربراہان کو دعوت دینے کا مقصد چارٹر آف اکانومی پر تبادلہ خیال کرنا ہے جس سے ایک مشترکہ نقطہ نظر تشکیل دینے میں مدد ملے گی اور ایک جامع و منظم معاشی منصوبہ بندی سامنے آئے گی۔
انہوں نے کہا کہ لاہور چیمبر آف کامرس اینڈ انڈسٹری کی جانب سے اٹھایا گیا قدم نجی شعبے اور سیاسی جماعتوں کے درمیان تعاون اور اتفاق رائے کی راہ بھی ہموار کرے گا۔ لاہور چیمبر آف کامرس اینڈ انڈسٹری کے صدر نے توقع ظاہر کی کہ سیاسی جماعتیں لاہور چیمبر آف کامرس اینڈ انڈسٹری کی جانب سے اٹھائے گئے قدم پر مثبت ردّ عمل کا اظہار کرتے ہوئے چارٹر آف اکانومی کی راہ ہموار کریں گی۔
