لاہور(کرائم رپورٹر) گزشتہ ماہ کے آغاز میں ہربنس پورہ کے علاقہ میں ایک کلینک پر بیٹھے شہری شاہد رشید کو نامعلوم شوٹرز نے فائرنگ کر کے قتل کر دیا اور فرار ہو گئے تھے۔ پولیس نے موقع پر پہنچ کر لاش کو تحویل میں لیا اور پوسٹ مارٹم کے بعد ورثاء کے حوالے کر کے نامعلوم ملزمان کے خلاف مقدمہ درج کر کے تفتیش کا آغاز کر دیا۔
انوسٹی گیشن ہربنس پورہ نے موقع واردات کے ارد گرد کے سی سی ٹی وی کیمروں کی مدد سے شوٹرز کی شناخت کی اور تفتیش کو موثر انداز میں کرتے ہوئے مقتول شاہد رشید کی بیوی سمیرا کے سعودیہ میں مقیم عاشق تک پہنچ گئی۔جہاں قتل کا راز فاش ہو گیا تفصیلات کے مطابق ہربنس پورہ میں کلینک پر قتل ہونے والے شاہد رشید کی بیوی سمیرا کے اپنے سعودیہ مقیم عاشق اور کزن راشد کے ساتھ ناجائز تعلقات تھے۔
مرکزی ملزم جب بھی پاکستان آتا دونوں مقتول شاہد رشید سے چھپ کر ملتے تھے جس کا شاہد رشید کو شک ہو گیا تھا جس پر سمیرا نے اپنے کزن راشد سے مل کر شوٹرز کے ذریعے شاہد رشید کو قتل کروانے کا منصوبہ بنایا۔
ملزمہ نے عابد عرف پپو وغیرہ کو 13 لاکھ روپے میں شاہد رشید کو قتل کرنے کا منصوبہ بنایا اور مقتول شاہد رشید کے قتل کے لئے 3 لاکھ روپے ایڈوانس دئیے جس پر شوٹرز عابد حسین اور نقاش نے ہومیو پیتھک کلینک میں بیٹھے شاہد رشید کو اندھا دھند فائرنگ کر کے قتل کر دیا اور فرار ہو گئے۔
ایس پی کینٹ انوسٹی گیشن اخلاق احمد کی سربراہی میں اے ایس پی ایاز انچارج انوسٹی گیشن رضوان اور نعیم نے موثر تفتیش کے باعث ملزمان کو ٹریس کیا اور ملزمہ سمیرا سمیت دو شوٹرز عابد عرف پپو اور نقاش کو گرفتار کر لیا ہے۔
ایس پی انویسٹیگیشن کینٹ اخلاق احمد کے مطابق ملزمان ریکارڈ یافتہ ہیں اور اس سے قبل بھی مختلف وارداتوں میں ملوث رہ چکے ہیں۔ ایس پی کینٹ کے مطابق مرکزی ملزم کی گرفتاری کےلیے انٹرپول کی مدد لی جائے گی۔
