کوئٹہ(نیوز رپورٹر)بلوچستان نیشنل پارٹی (مینگل)کا لانگ مارچ جاری ہے ۔ سربراہ بی این پی اختر جان مینگل نے کہا ہے کہ لانگ مارچ کے کوئٹہ پہنچنے پر دھرنا دیا جائیگا، کنٹینرز ہمارا راستہ نہیں روک سکتے، بلوچ قوم دنیا کو دکھائے گی کہ بلوچ خواتین و بچوں کو ہراساں کرنے کا مطلب کیا ہوتا ہے، لانگ مارچ جاری رہے گا چاہے ہمیں ہر قدم پیدل طے کرنا پڑے، بزدلانہ ہتھکنڈے ہمارے حوصلے پست نہیں کر سکتے۔
ایکس پر پیغام میں اختر مینگل کا کہنا تھا کہ پر امن لانگ مارچ کے لیے ہماری وابستگی کے باوجود، ہماری آواز کو دبانے کی کوشش میں خضدار سے کوئٹہ جانے والی سڑکوں اور تمام مرکزی داخلی راستوں کو کنٹینرز لگا کر بند کر دیا گیا، ہم خاموش نہیں رہیں گے۔
انہوں نے کہا کہ بلوچ گرفتار خواتین کی رہائی تک مارچ کے شرکا کوئٹہ میں دھرنا دینگے، دھرنے کے مقام کا اعلان موقع پر پہنچ کر کرونگا۔ خضدار سے کوئٹہ تک تمام پٹرول پمپس سیل کر دیئے گئے ہیں اور موبائل نیٹ ورک مکمل طور پر بند کر دیئے گئے ہیں۔ اس کے باوجود، ہزاروں لوگ سڑکوں پر نکل آئے ہیں۔ لانگ مارچ جاری رہے گا چاہے ہمیں ہر قدم پیدل طے کرنا پڑے۔
