اسلام آ باد (نمائندہ خصوصی ) سابق وزیر داخلہ شیخ رشید احمد نے کہا ہے کہ لال حویلی پر حملہ ہونے کا خطرہ ہے،ہماری 4 مرلے کی حویلی انہیں حضم نہیں ہوتی، پاکستان پر ابھی بھی ڈیفالٹ کی تلوار لٹک رہی ہے،
حکومت نے رمضان میں 20 ارب کی دیہاڑی لگائی،پی ڈی ایم اندر سے ٹوٹ پھوٹ کا شکار ہے،پنجاب پرویز الہی کے گھر پر ریڈ کے ذمہ دار محسن نقوی ہیں۔ پیر کو نجی ٹی وی پروگرام صبح سے آگے میں گفتگو کرتے ہوئے انہوں نے کہا کہ دو سے تین دن میں لال حویلی پر حملہ کیے جانے کا پلان ہے۔
ہماری 4 مرلے کی حویلی انہیں حضم نہیں ہوتی، ان سے پوچھا جائے کہ بکتر بند گاڑی کا کنٹرول کس کے پاس ہے؟ شیخ رشید کا کہنا تھا کہ پاکستان پر ابھی بھی ڈیفالٹ کی تلوار لٹک رہی ہے۔ حکومت نے رمضان میں 20 ارب کی دیہاڑی لگائی۔ بقول شاہد خاقان عباسی کے آٹے کی لائن میں 20 جانیں گئیں۔ پاکستان ڈیموکریٹک موومنٹ (پی ڈی ایم) اندر سے ٹوٹ پھوٹ کا شکار ہے۔
شیخ رشید نے کہا کہ سابق وزیراعلی پنجاب پرویز الہی کے گھر پر ریڈ کے ذمہ دار محسن نقوی ہیں۔ محسن نقوی ان کا رشتہ دار بھی ہے۔ پنجاب انتخابات سے متعلق کیس کے حوالے سے انہوں نے کہا کہ سپریم کورٹ آف پاکستان کا کنڈکٹ بحث کرنا آئین کی خلاف ورزی ہے۔ 10 مئی اہم دن ہے، اہم فیصلہ آجائے گا۔ سابق وزیر داخلہ کا مزید کہنا تھا کہ وزیراعظم شہباز شریف اور حنا ربانی کھر کی آڈیو لیک ہوئی۔ وزیراعظم اور وزیر مملکت کی آڈیو قومی سلامتی سے متعلق ہے۔
