کولمبو (سپورٹس ڈیسک)قومی اسٹار محمد آصف نے سارک اسنوکر چیمپئن شپ جیت لی۔کولمبو میں ہونے والی چیمپئن شپ میں محمد آصف نے شاندار کارکردگی دکھائی اور ناقابل شکست رہے۔
محمد آصف نے کوئی فریم ڈراپ کیے بغیر فائنل جیتا، انہوں نے فائنل میں سری لنکن کیوسٹ کو شکست دی، فاتح کیوئسٹ نے سری لنکن حریف کو 5 صفر سے شکست دی۔اس سے قبل نومبر میں محمد آصف نے تیسری بار ورلڈ اسنوکر چیمپئن شپ کا ٹائٹل جیتا تھا، انہوں نے فائنل میں ایرانی حریف علی گھراہگوزلو کو 3 کے مقابلے میں 5 فریم سے شکست دی تھی۔وہ قطر میں کھیلے جانے والے ایونٹ کے سیمی فائنل میں قبرص کے مائیکل جارجیو کو 3ـ5 سے شکست دے کر تیسری بار ورلڈ اسنوکر چیمپئن شپ کے فائنل میں پہنچے تھے۔
اس سے قبل کوارٹر فائنل میں انہوں نے متحدہ عرب امارات (یو اے ای )کے محمد شہاب کو 1ـ4 سے ہرا کر سیمی فائنل میں جگہ بنائی تھی۔محمد آصف نے اس سے قبل 2012 اور 2019 میں بھی ورلڈ اسنوکر فائنل جیتا تھا۔صدرمملکت آصف زرداری نے محمد آصف کو تیسری سارک چیمپئن شپ جیتنے پر مبارکباد دی۔ایوان صدر نے بیان کے مطابق انہوں نے کہا کہ محمد آصف نے فائنل سمیت پوری چیمپئن شپ میں بہترین کھیل پیش کیا۔
صدر مملکت نے کہا کہ محمد آصف نے اسنوکر کے کھیل میں پاکستان کا نام روشن کیا،محمد آصف کی مستقبل میں کامیابیوں کیلئے بھی دعا گو ہوں۔وزیراعظم محمد شہباز شریف نے پاکستانی اسنوکر کھلاڑی محمد آصف کو تیسری سارک اسنوکر چیمپئن شپ جیتنے پر مبارکباد دی اور کہاکہ محمد آصف نے اسنوکر کی ایک اہم چیمپئن شپ جیت کر ملک کا نام پوری دنیا میں روشن کیا ۔ انہوںنے کہاکہ پوری قوم کو آپ پر فخر ہے۔وزیراعظم نے محمد آصف کے مستقبل کے لئے نیک خواہشات کا اظہار کیا ۔
