امریکی صدر ڈونلڈ ٹرمپ نے کہا ہے کہ فیلڈ مارشل سید عاصم منیر ایران کی صورتحال سے نہ صرف بخوبی واقف ہیں بلکہ ان کی بصیرت دوسروں سے کہیں بہتر ہے، اور موجودہ کشیدہ حالات پر وہ گہری تشویش رکھتے ہیں۔
یہ تبصرہ اس وقت سامنے آیا جب فیلڈ مارشل عاصم منیر اور صدر ٹرمپ کے درمیان وائٹ ہاؤس میں اوول آفس اور خصوصی ظہرانے کے دوران ایک اہم ملاقات ہوئی۔ اس اعلیٰ سطحی ملاقات میں کئی بین الاقوامی اور دوطرفہ امور زیرِ بحث آئے۔
پاک فوج کے ترجمان کے مطابق، ملاقات میں امریکی سیکریٹری خارجہ مارکو روبیو اور مشرق وسطیٰ کے لیے خصوصی مندوب سٹیو ویٹکوف بھی موجود تھے، جب کہ فیلڈ مارشل کے ہمراہ پاکستان کے قومی سلامتی مشیر بھی شریک تھے۔
فیلڈ مارشل عاصم منیر نے بھارت کے ساتھ حالیہ کشیدگی کے بعد جنگ بندی کے لیے امریکی صدر کی کوششوں کو سراہا اور پاکستانی قوم کی جانب سے شکریہ ادا کیا۔ انہوں نے صدر ٹرمپ کی عالمی سطح پر قائدانہ کردار اور عالمی چیلنجز سے نمٹنے کی حکمتِ عملی کو بھی سراہا۔
صدر ٹرمپ نے دونوں ممالک کے درمیان انسدادِ دہشت گردی کے شعبے میں جاری تعاون اور پاکستان کے امن قائم رکھنے کے اقدامات کو سراہتے ہوئے کہا کہ امریکا اس تعاون کو مزید مضبوط بنانا چاہتا ہے۔
ملاقات میں معاشی روابط بڑھانے پر بھی اتفاق ہوا، جس میں مائننگ، مصنوعی ذہانت، توانائی، کرپٹو کرنسی اور دیگر اقتصادی شعبوں میں اشتراک پر زور دیا گیا۔
دونوں رہنماؤں نے ایران اور اسرائیل کے درمیان حالیہ تنازع پر تفصیلی گفتگو کی۔ اس موقع پر صدر ٹرمپ نے فیلڈ مارشل عاصم منیر کی قیادت اور حکمتِ عملی پر اعتماد کا اظہار کیا اور ان کی فیصلہ سازی کی صلاحیتوں کو سراہا۔
