فیصل آباد ( کرائم رپورٹر) فیصل آباد میں قتل ہونے سابق صدر ڈسٹرکٹ بار نوید مختار اور ڈرائیور کی ابتدائی پوسٹ مارٹم رپورٹ جاری کردی گئی۔
پوسٹمارٹم رپورٹ کے مطابق نوید مختار کو 44گولیاں لگیں جبکہ ان کے ڈرائیور بنیامین کو 12گولیاں لگیں۔پولیس کی جانب سے واقعے کو ٹارگٹ کلنگ بتایا جارہا ہے۔ڈسٹرکٹ بار کے سابق صدر اپنے چیمبر آ رہے تھے کہ سمندری روڈ پر موٹرسائیکل سوار 2 افراد نے کار پر اندھا دھند فائرنگ کردی۔ جس کے نتیجے میں ایڈووکیٹ نوید مختار اور ان کا ڈرائیور موقع پر ہی جاں بحق ہوگئے۔
فائرنگ کے واقعہ کی فوٹیج بھی سامنے آ گئی ہے جس میں موٹرسائیکل سوار ملزمان کو اندھا دھند فائرنگ کرتے اور فرار ہوتے دیکھا جا سکتا ہے۔پولیس کا کہنا ہے کہ نوید مختار گھمن خاندان کی ساہی برادری سے دیرینہ دشمنی تھی اور اسی دشمنی پر مقتول کے چچا بھی قتل ہو چکے ہیں۔واقعے کے خلاف وکلا نے ضلع کونسل چوک میں دھرنا دے دیا۔وکلاء کا کہنا ہے کہ ملزمان کی گرفتاری تک دھرنا جاری رہے گا۔
