پاکستان مسلم لیگ (ن) کے صدر اور سابق وزیراعظم نواز شریف نے کہا ہے کہ ہماری جماعت نے ہمیشہ عوامی سہولت اور ملک کی خدمت کو ترجیح دی ہے، یہ ہماری سیاست کا حصہ ہے، یہی ہماری روایت ہے۔
نواز شریف نے وفاقی وزیر توانائی سردار اویس خان لغاری سے ملاقات کی اور بجلی کی قیمتوں میں کمی پر مبارکباد دی۔
نواز شریف نے اویس لغاری سے گفتگو کرتے ہوئے کہا کہ عوام کی آسانی میرے دل کا سکون ہے، وزیراعظم شہباز شریف اور ان کی ٹیم کو شاباش دیتا ہوں۔
انہوں نے کہا کہ آئی ایم ایف پروگرام میں ہوتے ہوئے بجلی کی قیمتوں میں کمی ایک چیلنج تھا، اللہ کا شکر ہے کہ عوام سے کیے گئے وعدے پورے ہو رہے ہیں۔
نواز شریف نے کہا کہ مسلم لیگ (ن) نے ہمیشہ عوام کے ریلیف اور ملک کی خدمت کو مقدم رکھا ہے، یہی ہماری روایت ہے، یہی ہماری سیاست ہے۔
اس موقع پر سردار اویس لغاری نے کہا کہ آپ کی رہنمائی نے وزیراعظم شہباز شریف اور ان کی ٹیم کو کامیاب بنایا۔
وفاقی وزیر نے پارٹی قائد کو توانائی کے شعبے میں اصلاحات، اوپن مارکیٹ کے قیام سے بجلی مزید سستی کرنے، بجلی چوری اور گردشی قرض سے مستقل نجات کے اقدامات سے آگاہ کیا۔
