راولپنڈی میں میڈیا سے گفتگو کرتے ہوئے تحریک انصاف کے رہنما عمر ایوب نے کہا کہ پیٹرولیم مصنوعات کی قیمتوں میں کمی کا فائدہ بلوچستان کو دینے کا حکومتی دعویٰ محض فریب ہے۔
انہوں نے کہا کہ شہباز شریف کو جھوٹ بولنے میں مہارت حاصل ہے، اور پیٹرولیم ڈویلپمنٹ لیوی کی حقیقت عوام سے چھپائی جا رہی ہے۔ عمر ایوب نے زور دیا کہ روپے کی قدر میں کمی کے نتیجے میں قومی قرضے میں 14 ہزار 450 ارب روپے کا اضافہ ہوا ہے، جبکہ مہنگائی میں مزید اضافہ متوقع ہے۔
عمر ایوب نے حکومت سے سوال کیا کہ اگر بلوچستان کو ریلیف دینا ہے تو اس کے لیے فنڈ کہاں سے آئیں گے؟ اور اب تک کون سے فنڈز اس صوبے میں استعمال کیے گئے ہیں؟
انہوں نے مزید کہا کہ اختر مینگل جیسے رہنماؤں کا راستہ روکا گیا، اور آج حکومتی نمائندے بلوچستان کا دورہ بغیر سیکیورٹی کے نہیں کر سکتے۔ وزیراعلیٰ بلوچستان خود کوئٹہ سے باہر نکلنے کے لیے سیکیورٹی کے محتاج ہیں۔
