عمران خان اڈیالہ جیل سے آرمی چیف کو خط پر خط لکھ کر ترلے کررہے ہیں،خواجہ آصف

اسلام آباد(نیوز رپورٹر)وزیر دفا ع خواجہ آصف نے کہا ہے کہ بانی پی ٹی آئی عمران خان اڈیالہ جیل سے آرمی چیف کو خط پر خط لکھ کر ترلے کررہے ہیں، بانی پی ٹی آئی چاہتے تھے کہ فوج ان کی جماعت کا ذیلی ادارہ بن جائے،انہوں نے آرمی چیف کو قوم کا باپ قراردیا، پی ٹی آئی کا طر ز عمل ہرگزسیاسی نہیں۔

ایک انٹرویو میں خواجہ آصف کا کہنا تھا کہ آرمی چیف جنرل عاصم منیر ان دنوں دورہ برطانیہ پر ہیں، ان کو عزت واحترام کے ساتھ گارڈ آف آنردیا گیا۔ برطانیہ کے ساتھ اہم سفارتی، عسکری اورمعاشی تعلقات ہیں۔ دونوں ملکوں کے درمیان مختلف شعبوں میں تعلقات مثالی ہیں۔ کئی دہائیوں سے پاکستانی برطانیہ میں مقیم ہیں۔

خواجہ آصف نے کہا کہ آرمی چیف کے خلاف منفی مہم چلائی جارہی ہے، یہ اپنے دور میں کہا کرتے تھے آرمی چیف قوم کا باپ ہوتا ہے، سوشل میڈیا پر پی ٹی آئی کے لوگ آرمی چیف کے خلاف غلط زبان استعمال کررہے ہیں۔

انہوں نے کہا کہ یہ فیض حمید کو آرمی چیف بنانا چاہتے تھے، یہ فوج کو پی ٹی آئی کا ذیلی ادارہ بنانا چاہتے تھے، اس وقت پی ٹی آئی اپنے زخم چاٹ رہی ہے، انہوں نے 9مئی اور26نومبر برپا کیا، انہوں نے شہدا کی یادگاروں پر حملے کیے، ایسا وطیرہ کسی سیاسی پارٹی کا نہیں جو پی ٹی آئی نے اپنایا ہوا ہے۔

خواجہ آصف کا کہنا تھا کہ یہ اب آرمی چیف کو بار بار خط لکھ رہے ہیں پاﺅں پکڑ رہے ہیں، دوسری طرف یہ سوشل میڈیا پر غلط زبان استعمال کررہے ہیں، پی ٹی آئی والے دوسرے ممالک میں بیٹھ کر پاکستان کے خلاف بدترین قسم کا پراپیگنڈا کررہے ہیں۔ پی ٹی آئی کا مکروہ چہرہ سامنے آرہا ہے، انکو اس طرح کی باتیں اور زبان استعمال کرنا زیب نہیں دیتا، وزیر دفاع نے کہا کہ پاکستانی معیشت سنبھل رہی ہے، سیاسی حالات بھی بہتر ہو رہے ہیں، معاشی حالات سنبھل رہے ہیں اس کا پی ٹی آئی کو دکھ ہورہا ہے، انہوں نے آئی ایم ایف کو بھی خط لکھے تھے، ان کی سیاست ایک ذات کے گرد گھوم رہی ہے

انہوں نے عدلیہ کو اپنی جیب میں ڈالا ہوا تھا، عدلیہ آزاد ہوئی ہے تو ان کو اس کی بھی تکلیف ہے۔لیگی رہنما کا مزید کہنا تھا کہ پی ٹی آئی بیرون ممالک میں لابیز پر پیسے خرچ کررہی ہے ،ملک کو قوم کے خلاف ایسی راہ بانی پی ٹی آئی کے علاوہ کسی نے نہیں اپنائی۔ یہ وقت گزر جائے گا، چند ماہ یا سال کی بات ہے سب چیزیں درست ہوجائیں گی، ان کی سیاست ہمیشہ کیلئے دفن ہوجائے گی، پاکستان اس وقت ترقی کی راہ پر گامزن ہے، کوئی بھی سازش پاکستان کو نقصان نہیں پہنچا سکتی۔