لاہو ر( سپورٹس ڈیسک)قومی ٹیم کے فاسٹ بولر سہیل خان نے بھارتی ٹیم کے نوجوان فاسٹ بولر عْمران ملک کے حوالے سے کہا ہے کہ عْمران جیسے بولرز تو ہمارے ڈومیسٹک میں بھرے پڑے ہیں۔
ایک انٹرویومیں سہیل خان نے کہاکہ اس میں کوئی شک نہیں ہے عْمران ملک ایک ابھرتا ہوا فاسٹ بولر ہے، میں نے اس کے ایک دو میچز دیکھے ہیں، وہ تیز بھاگتا ہے اور دیگر عوامل کو بھی اپنے ذہن میں رکھتا ہے۔انہوں نے کہا کہ اگر آپ فاسٹ بولنگ کے حوالے سے سوچ رہے ہیں کہ وہ 150 سے 155 کلو میٹر فی گھنٹہ کی رفتار سے گیند کراتا ہے تو میں انگلیوں پر 10 سے 15 کھلاڑیوں کو گنوا سکتا ہوں جو ٹیپ بال کھیلتے ہیں اور اس کی رفتار سے گیند کرتے ہیں۔فاسٹ بولر نے کہاکہ اگر آپ لاہور قلندرز کی جانب سے لگائے گئے ٹرائلز میں جا کر دیکھیں تو اس جیسے بہت سے بولرز نظر آئیں گے، ہماری ڈومیسٹک میں عْمران جیسے بولر بھرے پڑے ہیں۔یاد رہے کہ پوڈ کاسٹ کے دوران سہیل خان نے 2015 میں ہونے والے ورلڈکپ کے دوران ویرات کوہلی سے ہونے والی تکرار کے پیچھے کی کہانی بھی سنائی تھی۔
سہیل خان کے مطابق بھارت کے خلاف ہمارا پہلا میچ تھا، بھارتی اننگز کے بعد جب پاکستان کی بیٹنگ جاری تھی اور میں بیٹنگ کیلئے آیا تو ویرات کوہلی نے جملے کسے کہ جمعہ جمعہ 8 دن ہوئے ہیں آپ کو کرکٹ میں آئے ہوئے اور آپ اتنی باتیں کرتے ہیں۔سہیل خان نے بتایا کہ میں نے جواب دیا بیٹا جب آپ انڈیا انڈر 19 میں کھیل رہے تھے تب آپ کا باپ ٹیسٹ کرکٹر تھا جس پر مصباح بھائی آئے اور مجھ پر غصہ کیا کہ خاموش ہو جاؤ، ادھر سے دھونی آیا اور ویرات سے کہا سائیڈ میں ہو جاؤ، یہ (سہیل) پرانا چاول ہے، تم اس کو نہیں جانتے۔فاسٹ بولر نے کہا اس کے بعد ویرات کوہلی سیدھا ہو گیا اور جاکر فیلڈ پر کھڑا ہو گیا۔
