ممبئی(شوبز رپورٹر)ممبئی کی عدالت نے بھارتی اداکارہ اور بی جے پی کی رکن پارلیمنٹ کنگنا رناوت کو آخری وارننگ دیدی۔
عدالت نے رکن پارلیمنٹ کنگنا رناوت کو ہدایت دی ہے کہ وہ ہتک عزت کے مقدمے میں حاضری یقینی بنائیں، بصورت دیگر ان کے خلاف ناقابل ضمانت وارنٹ جاری کئے جاسکتے ہیں۔
بھارتی میڈیا کے مطابق یہ مقدمہ معروف شاعر اور نغمہ نگار جاوید اختر کی جانب سے دائر کیا گیا تھا، کنگنا کے وکیل رضوان صدیقی نے عدالت کو آگاہ کیا کہ وہ پارلیمنٹ کے اجلاس میں مصروف ہونے کی وجہ سے پیش نہیں ہو سکیں۔جاوید اختر کے وکیل جے کے بھاردواج نے درخواست دائر کی کہ کنگنا کے بار بار غیر حاضر رہنے پر ناقابل ضمانت وارنٹ جاری کئے جائیں، ان کے مطابق اداکارہ تقریبا 40 مواقع پر عدالت میں پیش نہیں ہوئیں۔
عدالت نے کنگنا کے وکیل کو درخواست پر جواب داخل کرنے کی ہدایت دی اور ان کے اعتراض کے باوجود انہیں حاضری کے لئے آخری موقع دیا ہے تاہم اس مرتبہ پیش نہ ہونے پر اداکارہ کیخلاف ناقابل ضمانت وارنٹ جاری کئے جاسکتے ہیں۔واضح رہے کہ یہ تنازع 2016 میں اس وقت شروع ہوا جب جاوید اختر نے کنگنا رناوت کو اپنے گھر بلا کر اداکار ہریتھک روشن سے معافی مانگنے کے لیے کہا تھا۔
