اسلام آباد:
وفاقی وزیر خزانہ محمد اورنگزیب نے کہا ہے کہ ریونیو آٹومیشن لمیٹڈ (پرال) میں شفافیت اور کارکردگی بڑھانے کے لیے اہم اصلاحات نافذ کر دی گئی ہیں، جن کا مقصد ٹیکس نظام کو جدید اور مؤثر بنانا ہے۔
اوورسیز انویسٹرز چیمبر آف کامرس اینڈ انڈسٹری سے ورچوئل خطاب میں وزیر خزانہ نے کہا کہ حالیہ امریکی دورے کے دوران بین الاقوامی سرمایہ کاروں نے پاکستان کی معاشی پالیسیوں پر اعتماد کا اظہار کیا ہے، اور اصلاحات کے تسلسل کو خوش آئند قرار دیا ہے۔
محمد اورنگزیب کے مطابق، حکومت سرمایہ کاری کے لیے سازگار ماحول، منصفانہ ٹیکس نظام، اور مالیاتی پائیداری کے لیے پرعزم ہے۔ انہوں نے ٹیکس نیٹ بڑھانے اور جی ڈی پی کے تناسب سے ٹیکس ریونیو میں اضافے کو معاشی بہتری کے لیے ناگزیر قرار دیا۔
او آئی سی سی آئی کے صدر یوسف حسین نے حکومت کے معاشی وژن کو سراہتے ہوئے کہا کہ برآمدات، مقامی وسائل اور پیداواری صلاحیت میں اضافہ پاکستان کو ترقی کی نئی راہوں پر لے جا سکتا ہے۔
تنظیم کے سیکریٹری جنرل ایم عبدالعلیم نے وزیر خزانہ کی واشنگٹن میں عالمی اسٹیک ہولڈرز سے کامیاب ملاقاتوں کو سراہا اور حکومتی پالیسیوں کو سرمایہ کاری کے لیے مثبت پیغام قرار دیا۔
