نیویارک (کامرس ڈیسک ) عالمی بینک نے صوبہ سندھ میں سیلاب متاثرین کے لیے امداد کے شفاف استعمال کویقینی بنانے اور تمام ضرورتمندوں تک پہنچنے کی اہمیت پر زور دیا ہے۔
ورلڈ بینک کے ڈائریکٹرز نے گفتگو کرتے ہوئے کہا کہ صوبائی اور وفاقی حکام کو امداد کی تقسیم اور اس کے عمل درآمد کے نظام کو مستحکم کرنے کی ضرورت ہے تاکہ ترقیاتی فنڈز کے درست استعمال کی صلاحیت میں اضافہ اور متاثرہ علاقوں کی بحالی کے ہدف کو حاصل کرنے کو یقینی بنایا جا سکے۔
ڈائریکٹرز نے عطیہ دہندگان کے تعاون اور شہریوں کی شمولیت بالخصوص سیلاب سے تباہی کے بعد امداد کی ضرورت اور طویل مدتی سیلاب سے بحالی اور اقدامات کا خیرمقدم کیا۔عالمی بینک کے بورڈ آف ایگزیکٹو ڈائریکٹر نے گزشتہ ہفتے صوبہ سندھ میں سیلاب متاثرین کیلئے ایک ارب 69 کروڑ ڈالر کے5 منصوبوں کی منظوری دے دی تھی۔سیلاب متاثرین کی بحالی، گھروں کی تعمیرنو اور فصلوں کی پیداوار کی بحالی کے 3 منصوبے جبکہ ماں اور بچوں کی صحت سے متعلق دیگر 2 منصوبے منظور کیے گئے تھے
