فیصل آباد (کامرس ڈیسک)ملک میں ضروری اشیاکی قیمتوں میں ہفتہ وار بنیادوں پر 0.15 فیصد اور سالانہ بنیادوں پر 1.26 فیصد کمی ریکارڈکی گئی ہے۔
ادارہ برائے شماریات پاکستان کی جانب سے قیمتوں کے حساس اشاریہ بارے ہفتہ وار رپورٹ کے مطابق 27 مارچ کو ختم ہونے والے ہفتہ میں صارفین کے لئے قیمتوں کا حساس اشاریہ 319.14 پوائنٹس ریکارڈکیا گیا جو پیوستہ ہفتے 319.62 پوائنٹس تھا۔گزشتہ ہفتے کے دوران روزمرہ استعمال کی 10 اشیا کی قیمتوں میں کمی اور 31 کی قیمتوں میں استحکام رہا۔ اس کے برعکس 10 اشیا کی قیمتوں میں اضافہ ہوا۔
گزشتہ ہفتے کے دوران پیاز کی قیمت میں 4.68 فیصد، کیلا 4.27، انڈے 3.87، لہسن 2.23، آلو1.47، چکن 129، چینی 0.94 اور دال چنا کی قیمت میں 0.67 فیصد کمی ہوئی، اس کے برعکس ٹماٹر کی قیمت میں 9.62 فیصد، ایل پی جی 1.17، پرنٹڈ لان 0.62، دال ماش 0.56، گڑ 0.51 فیصد، بیف 0.30، لانگ کلاتھ 0.29، دال مسور 0.20، سرسوں کا تیل 0.13 اور ڈیڑھ کلو بناسپتی گھی کی قیمت میں 0.10 فیصد اضافہ ہوا۔
سب سے کم یعنی 17732 روپے ماہوار آمدنی رکھنے والے گروپ کے قیمتوں کے حساس اشاریے میں 0.21 فیصد کمی ہوئی، 17733 روپے سے لے کر 22888 روپے، 22889 روپے سے لے کر 29517 روپے، 29518 روپے سے لے کر 44175 اور اس سے زیادہ آمدنی رکھنے والے گروپوں کے لئے قیمتوں کے حساس اشاریے میں بالترتیب 0.20، 0.16، 0.16 اور 0.13 فیصد کمی ریکارڈکی گئی ہے۔صارفین کے لئے قیمتوں کے حساس اشاریے کا تعین ملک کے 17 بڑے شہروں کی 50 مارکیٹوں میں 51 ضروری اشیا کی قیمتوں میں کمی بیشی کی بنیاد پر کیا جا تا ہے۔
