بالی ووڈ کے لیجنڈ اداکار دھرمیندر کی زندگی ایک متاثر کن کہانی ہے — ایک ایسا شخص جس نے فلمی دنیا میں قدم 51 روپے کے معمولی معاوضے سے رکھا، اور آج وہ 450 کروڑ روپے کی دولت کے مالک ہیں۔
دھرمیندر نے 1960 میں فلم "دل بھی تیرا ہم بھی تیرے” سے کیریئر کا آغاز کیا، اور اس وقت انہیں صرف 51 روپے دیے گئے تھے۔ شروعاتی دنوں میں ان کے پاس کرائے کے لیے پیسے بھی نہیں ہوتے تھے اور وہ دوستوں کے گھروں میں قیام کرتے تھے۔
لیکن ان کی محنت، صلاحیت اور استقامت نے انہیں ہندی سنیما کا ناقابلِ فراموش ستارہ بنا دیا۔ فلمی دنیا سے حاصل ہونے والی آمدن کے ساتھ ساتھ، انہوں نے ہوٹل انڈسٹری اور رئیل اسٹیٹ میں بھی سرمایہ کاری کی۔
دھرمیندر کا 100 ایکڑ پر پھیلا ہوا لوناوالا فارم ہاؤس ان کی سب سے قیمتی جائیدادوں میں شامل ہے، جس میں باغات، سوئمنگ پول، اور جدید طرز کا جم بھی شامل ہے۔ وہ یہاں اپنے اہل خانہ کے ساتھ زیادہ وقت گزارتے ہیں۔
حال ہی میں وہ فلم "راکی اور رانی کی پریم کہانی” میں نظر آئے، اور اب جلد آنے والی فلم "اکیس” میں امیتابھ بچن کے نواسے اگستیہ نندا کے ساتھ اداکاری کرتے دکھائی دیں گے۔
