بیجنگ (نیوز ڈیسک) چینی صدر شی جن پھنگ نے چین اور میانمار کے درمیان سفارتی تعلقات کے قیام کی پچھترہویں سالگرہ کے موقع پر میانمار کے رہنما من آنگ ہلائینگ کے ساتھ تہنیتی پیغامات کا تبادلہ کیا۔
شی جن پھنگ نے اپنے پیغام میں کہا کہ سفارتی تعلقات کےقیام کے گزشتہ75 سالوں میں چین اور میانمار نے پرامن بقائے باہمی کے پانچ اصولوں اور بانڈونگ اسپرٹ کو برقرار رکھتے ہوئے باہمی مرکزی مفادات اور اہم خدشات سے متعلق امور پر ایک دوسرے کی بھرپور حمایت کی ہے اور ممالک کے درمیان دوستانہ تبادلوں کی ایک مثال قائم کی ہے۔
شی جن پھنگ نے اس بات پر زور دیا کہ چین میانمار کے ساتھ اپنے تعلقات کی ترقی کو بہت اہمیت دیتا ہے اور دونوں ممالک کے درمیان سفارتی تعلقات کے قیام کی پچھترہویں سالگرہ کے موقع سے فائدہ اٹھا کر اعلیٰ معیار کے بیلٹ اینڈ روڈ تعاون کو تیزتر کرنے، گلوبل ڈیولپمنٹ انیشی ایٹو، گلوبل سیکیورٹی انیشی ایٹو اور گلوبل سولائزیشن انیشی ایٹو پر مشترکہ طور پر عمل کرنے کے لئے تیار ہے تاکہ چین میانمار ہم نصیب معاشرے کی تعمیر کو مسلسل فروغ دیا جائے اور دونوں ممالک کے عوام کو مزید فوائد پہنچائے جائیں۔
من آنگ ہلائینگ نے اپنے پیغام میں کہا کہ صدر شی جن پھنگ کے 2020 میں میانمار کے تاریخی دورے نے چین میانمار ہم نصیب معاشرے کی تعمیر میں ایک نئے باب کا آغاز کیا ہے۔من آنگ ہلائینگ نے امن و استحکام، قومی مفاہمت اور معاشی ترقی کے حصول کے لیے میانمار کی کوششوں کی بھرپور حمایت پر چین کا شکریہ ادا کیا اور توقع ظاہر کی کہ دونوں ممالک کے درمیان مختلف شعبوں میں تعاون کو تیز کیا جائے گا تاکہ ایک مضبوط، لچکدار اور باہمی فائدہ مند شراکت داری قائم کی جائے۔
اسی دن چینی وزیر اعظم لی چھیانگ نے بھی من آنگ ہلائینگ کے ساتھ تہنیتی پیغامات کا تبادلہ کیا۔
