تہران میں پاکستانی وزیراعظم شہباز شریف نے ایران کے سپریم لیڈر آیت اللّٰہ خامنہ ای سے اہم ملاقات کی، جس میں دوطرفہ تعلقات، علاقائی امن، اور امتِ مسلمہ کے مسائل پر تفصیلی بات چیت ہوئی۔
وزیراعظم شہباز شریف نے ایران کی طرف سے پاکستان کی مسلسل حمایت پر شکریہ ادا کیا اور آیت اللّٰہ خامنہ ای کو مسلم دنیا کی ایک عظیم رہنما قرار دیا۔ انہوں نے کہا کہ امتِ مسلمہ ایرانی رہبر کی قیادت اور رہنمائی کو قدر کی نگاہ سے دیکھتی ہے۔
ملاقات میں وزیراعظم نے بھارتی جارحیت اور توسیع پسندانہ عزائم پر ایرانی قیادت کو بریفنگ دی اور اس عزم کا اعادہ کیا کہ پاکستان خطے میں امن کا خواہاں ہے اور ایران کے ساتھ اسٹریٹجک تعلقات کو نئی بلندیوں تک لے جانا چاہتا ہے۔
آیت اللّٰہ خامنہ ای نے پاکستان کے کردار کو سراہتے ہوئے کہا کہ اسلامی دنیا میں پاکستان کو ایک منفرد مقام حاصل ہے، اور غزہ میں جاری صیہونی مظالم کے خلاف پاک-ایران کو مل کر عملی اقدامات کرنا ہوں گے۔
وزیراعظم شہباز شریف نے ایران کے پرامن نیوکلیئر پروگرام کی حمایت کا اعادہ کیا اور جوہری مذاکرات میں ایرانی قیادت کی حکمت و بصیرت کی تعریف کی۔ اس موقع پر انہوں نے علامہ اقبال سے آیت اللّٰہ خامنہ ای کی عقیدت کا بھی خصوصی ذکر کیا اور ایران کے روحانی پیشوا کو پاکستان کے سرکاری دورے کی دعوت دی۔
ملاقات کے دوران نائب وزیراعظم اسحاق ڈار، آرمی چیف فیلڈ مارشل سید عاصم منیر، وزیر داخلہ محسن نقوی، اور وزیر اطلاعات عطاء اللّٰہ تارڑ بھی وزیراعظم کے ہمراہ موجود تھے۔
وزیراعظم شہباز شریف ایرانی صدر کی دعوت پر آج دوپہر تہران پہنچے جہاں ایرانی وزیر داخلہ اور پاکستان میں ایران کے سفیر نے ان کا استقبال کیا۔ ہوائی اڈے پر ایرانی فوج کے چاک و چوبند دستے نے وزیراعظم کو گارڈ آف آنر پیش کیا۔
