کراچی (نمائندہ خصوصی)پاکستانی کرکٹر شعیب ملک نے اہلیہ بھارتی ٹینس سٹار ثانیہ مرزا سے طلاق یا علیحدگی کی خبروں کو مسترد کرنے یا ان کی تصدیق کرنے سے معذرت کرتے ہوئے واضح کیا ہے کہ وہ اور ثانیہ مرزا اس معاملے پر کوئی بات نہیں کریں گے۔دونوں سٹارز کے درمیان علیحدگی یا طلاق کی خبریں گزشتہ ماہ شروع ہوئی تھیں۔
علیحدگی اور طلاق کی افواہیں ابتدائی طور پر بھارتی میڈیا میں شائع ہوئی تھیں اور شوبز ویب سائٹس نے مستند ذرائع کا حوالہ دیے بغیر قیاس آرائیاں کی تھیں کہ ان کے درمیان اختلافات ہوگئے۔بعد ازاں نومبر میں ثانیہ مرزا کی سالگرہ پر شعیب ملک نے ان کے ہمراہ اپنی ایک تصویر انسٹاگرام پر پوسٹ کرتے ہوئے انہیں مبارک باد پیش کی تھی۔اس کے علاوہ دونوں کے جلد ہی اسٹریمنگ ویب سائٹ اردو فلکس پر شروع ہونے والے سلیبرٹی شو دی مرزا ملک شو کا بھی اعلان کیا گیا تھا۔شعیب ملک کی جانب سے ثانیہ مرزا کو سالگرہ کی مبارک باد دیے جانے اور دونوں کے شو کے اعلان کے بعد اگرچہ مداحوں نے سمجھ لیا تھا کہ ان کی طلاق اور علیحدگی کی خبریں سلیبرٹی شو کی تشہیر کا حصہ تھیں، تاہم اس حوالے سے دونوں شخصیات نے کوئی وضاحت نہیں کی تھی ،حال ہی میں ایک انٹرویو میں بھی شعیب ملک نے واضح طور پر اہلیہ سے اختلافات، علیحدگی اور طلاق کی خبروں کو مسترد یا انہیں تسلیم کرنے سے گریز کیا۔شعیب ملک نے بتایا کہ وہ اور ثانیہ مرزا میڈیا کے دبائو میں آکر اپنی ذاتی زندگی اور فیصلوں سے متعلق کوئی بات نہیں کریں گے۔انہوں نے واضح طور پر علیحدگی کا طلاق کی خبروں کو مسترد کرنے سے گریز کرتے ہوئے کہا کہ یہ ان کا ذاتی مسئلہ ہے، لوگ انہیں ان کے حال پر چھوڑ دیں اور ان کی نجی زندگی سے متعلق سوالات اٹھانا بند کریں۔ایک اور سوال کے جواب میں انہوں نے کہا کہ ان کے بیٹے نے بھی سکول جانا شروع کردیا ہے اور مصروفیات کی وجہ سے وہ اپنے خاندان کو زیادہ وقت نہیں دے پاتے۔شعیب ملک نے کہا کہ وہ شوبز سمیت کسی طرح کے موقع کے لیے خود کو محدود نہیں کریں گے، انہیں جتنے مواقع ملیں گے، وہ ان سے بھرپور فائدہ اٹھائیں گے۔اپنی زندگی پر فلم بنائے جانے کے حوالے سے پوچھے گئے ایک سوال کے جواب میں شعیب ملک نے کہا کہ انہیں خوشی ہوگی کہ ان کی زندگی پر فلم بنائی جائے اور ان کے پاکستان اور بھارت میں بہت سارے اداکار دوست ہیں جو ان کی زندگی کا حقیقی کردار ادا کر سکتے ہیں۔انہوں نے کہا کہ فوری طور پر ان کا اپنی زندگی پر فلم بنانے کا کوئی ارادہ نہیں، جب ان کا ارادہ ہوجائے گا تو وہ اپنے کردار کے لیے اپنے پسندیدہ اداکار کا نام بھی بتائیں گے۔
٭٭٭٭٭
