ممبئی (شوبز ڈیسک) بالی ووڈ کی دھک دھک گرل مادھوری ڈکشٹ نے شوہر ڈاکٹر شری رام نینے کیساتھ شادی کے ابتدائی دنوں کو مشکل ترین قرار دے دیا۔
مادھوری ڈکشٹ نے شوہر ڈاکٹر شری رام نینے کے یوٹیوب چینل پر زندگی کے مختلف پہلوئوں پر کھل کر بات کی۔مادھوری ڈکشٹ نے دوران گفتگو مداحوں کو اپنی شادی کے ابتدائی دنوں کے حوالے سے بتایا جب انہیں ہر چیز کا سامنا اکیلے کرنا پڑا،
ان کے مطابق وہ وقت بہت مشکل تھا۔انہوں نے کہا کہ ان کی شادی شدہ زندگی بعض اوقات مشکل رہی، انہیں ٹائم مینج کرنے میں مشکل کا سامنا کرنا پڑا، ڈاکٹر شری رام نینے کام کی وجہ سے ہر وقت مصروف رہتے تھے، کبھی کبھی تو دن اور رات کا پتہ ہی نہیں چلتا تھا، ہر دوسرے دن ان کی کال ہوتی۔
ایسے میں بچوں کی دیکھ بھال کرنا، انہیں سکول لے جانا، پھر واپس لانا اور گھر کے دیگر کام سب اکیلے ہی مینج کرنے پڑتے تھے، کبھی کوئی اہم موقع ہو لیکن یہ وہاں موجود نہیں ہوتے یا کبھی میں بیمار ہوجائوں تو یہ نہیں ہوتے کیونکہ انہیں مریضوں کی دیکھ بھال کیلئے جانا ہوتا تھا۔اداکارہ نے بتایا کہ تمام تر مصروفیات کے باوجود ہم دونوں کی یہ ہی کوشش رہی ہے کہ ہم کسی نہ کسی طرح کم از کم اپنے بچوں آریان اور ریان کیلئے کچھ وقت ساتھ نکال سکیں۔
انہوں نے کہا کہ اس سب کے باوجود مجھے ڈاکٹر شری رام نینے پر فخر ہے کہ وہ ایک بہترین انسان ہیں جو اپنے مریضوں کا بہت خیال رکھتے اور ان کے حقوق کے لئے ہر وقت کھڑے رہتے ہیں۔مادھوری ڈکشٹ نے کہا کہ ہم دونوں کی کوشش ہوتی کہ بچے پیار اور دیکھ بھال کے حوالے سے کسی کمی کو محسوس نہ کریں، بعض اوقات یہ مشکل بھی ہوجاتا تھا لیکن ہمیں اس بات کا ہمیشہ اطمینان رہتا کہ ہم جو کر رہے ہیں وہ ان کے بھلے کے لئے ہی کر رہے ہیں۔
