پاکستان تحریک انصاف کے چیئرمین بیرسٹر گوہر نے کہا ہے کہ ملک میں کسی بھی سیاسی جماعت کو دیوار سے لگانا جمہوریت کے لیے نیک شگون نہیں۔ سیاسی اختلافات کو سختیوں کے بجائے بات چیت سے حل ہونا چاہیے۔
بیرسٹر گوہر نے لاہور میں حماد اظہر کی رہائش گاہ پر سابق گورنر پنجاب میاں اظہر کے انتقال پر تعزیت کی۔ اس موقع پر پارٹی کے دیگر رہنما معین قریشی، ایم پی اے حافظ فرحت، فرخ جاوید مون، اور ایڈووکیٹ ابوذر سلمان نیازی بھی موجود تھے۔
میڈیا سے گفتگو کرتے ہوئے بیرسٹر گوہر نے کہا کہ میاں اظہر کی سیاسی خدمات ناقابلِ فراموش ہیں اور حماد اظہر نے مشکل ترین حالات میں پارٹی اور جمہوریت کے ساتھ وفاداری کا ثبوت دیا۔
انہوں نے کہا کہ تحریک انصاف پر فارن فنڈنگ جیسے الزامات لگائے گئے اور موجودہ حالات میں مزید الزامات بھی سامنے آ رہے ہیں، لیکن اس کے باوجود پارٹی آئینی سیاست کے دائرے میں رہ کر کام کر رہی ہے۔
بیرسٹر گوہر کا کہنا تھا کہ مذاکراتی عمل رکا ہوا ہے اور ماحول میں سختی کم کرنا تمام اسٹیک ہولڈرز کی ذمہ داری ہے۔ انہوں نے واضح کیا کہ تحریک انصاف تشدد یا انتشار پر یقین نہیں رکھتی، اور جمہوری بالا دستی کے لیے ہر سطح پر سنجیدہ کردار ادا کرنے کے لیے تیار ہے۔
