لاہور(سپورٹس ڈیسک) سہ فریقی سیریز اور چیمپئنز ٹرافی کے لیے پاکستان ون ڈے اسکواڈ کا اعلان ملتان میں جاری دوسرے ٹیسٹ میچ کے اختتام پر متوقع ہے۔
ذرائع کا کہنا ہے کہ قومی سلیکٹرز نے تمام مشاورت مکمل کر لی ہے، چیئرمین پی سی بی کی منظوری سے اسکواڈ کا اعلان کر دیا جائے گا۔جنوبی افریقہ کے خلاف کھیلنے والے ون ڈے اسکواڈ میں متعدد تبدیلیاں متوقع ہیں، صائم ایوب کی انجری کے باعث اسکواڈ میں شمولیت کا امکان نہیں ہے۔
ذرائع نے بتایا کہ فخر زمان، خوشدل شاہ اور سعود شکیل کی ٹیم میں شمولیت کا امکان ہے جبکہ عباس آفریدی اور عامر جمال کے ناموں پر غور کیا گیا۔محمد رضوان، بابر اعظم، سلمان آغا اور کامران غلام اسکواڈ میں شامل ہوں گے۔اس کے علاوہ نسیم شاہ، حارث رف، شاہین شاہ آفریدی اور ابرار احمد بھی اسکواڈ کا حصہ ہوں گے۔واضح رہے کہ سہ فریقی سیریز 8 فروری جبکہ چیمپئنز ٹرافی 19 فروری سے شروع ہو گی۔
