بالی ووڈ کے سپر اسٹار سلمان خان نے ایک بار پھر اپنے مداحوں کو حیران کردیا ہے۔ ’’بگ باس 19‘‘ کے گرینڈ پریمیئر میں گفتگو کرتے ہوئے دبنگ خان نے اعتراف کیا کہ انہیں آج تک ’’سچا پیار‘‘ نہیں ملا۔
شو کی مہمان تانیا متل کے سوال ’’کیا سچا پیار ہمیشہ ادھورا ہی رہ جاتا ہے؟‘‘ کے جواب میں سلمان خان نے مسکراتے ہوئے کہا:
’’مجھے نہیں معلوم، کیونکہ مجھے تو اب تک سچا پیار ہوا ہی نہیں۔‘‘
ان کے اس بیان کے بعد شو کا ماحول پرجوش ہوگیا، جبکہ مداح ایک بار پھر یہ سوچنے پر مجبور ہوگئے کہ بالی ووڈ کے سب سے مقبول اداکار، جنہیں ’’فار ایور سنگل‘‘ کہا جاتا ہے، آج تک اپنی محبت کی تلاش میں کامیاب کیوں نہیں ہوسکے۔
یہ بات اس لیے بھی دلچسپ ہے کہ سلمان خان کی زندگی میں کئی مشہور اداکارائیں شامل رہیں۔ ان کا نام کبھی ایشوریا رائے کے ساتھ جڑا، کبھی کترینہ کیف اور سنگیتا بجلانی کے ساتھ۔ لیکن گہرے تعلقات کے باوجود کوئی بھی رشتہ شادی میں نہ بدل سکا۔
اب جبکہ سلمان خان 58 سال کے ہوچکے ہیں، مداح یہ سوال اٹھا رہے ہیں کہ آیا وہ کبھی شادی کے بندھن میں بندھیں گے یا ہمیشہ ہی ’’سنگل خان‘‘ کے لقب کے ساتھ پہچانے جائیں گے۔ ان کے تازہ بیان نے ایک بار پھر سوشل میڈیا پر بحث چھیڑ دی ہے کہ آخر کب اور کہاں سلمان خان کو ’’سچا پیار‘‘ ملے گا۔
