لاہور(کامرس ڈیسک)سردی کی شدید لہر کی وجہ سے لاہور سمیت کئی شہروں میںگیس پریشرمیں کمی نے گھریلو صارفین کو پریشان کرکے رکھ دیا ہے، ایل پی جی اور لکڑی کا استعمال بڑھ گیا،
ہوٹلوں اور تندور والے بھی گیس پریشر میں کمی سے پریشان ہیں۔لاہور کے علاقہ بھاٹی گیٹ، انار کلی، رنگ محل، نسبت روڈ، گوالمنڈی، فیروز پور روڈ، سبزہ زار، گڑھی شاہو ،گرین ٹائون، ہربنس پورہ، سمن آباد، اچھرہ، گلشن راوی، چوبرجی ، محمد نگر ، شالیمار اور مزنگ سمیت کئی علاقوں میں صارفین کو گیس پریشر میں کمی کا سامنا ہے ۔
لاہور کے علاوہ دیگر شہروںمیں بھی گیس پریشر میں کمی کی وجہ سے خواتین کو کچن کے امور سر انجام دینے میں مشکلات کا سامنا ہے۔دوسری جانب ترجمان سوئی ناردرن گیس کمپنی کا کہنا ہے کہ تمام سیکٹرز کو گیس کی مسلسل فراہمی یقینی بنا رہے ہیں، کھانا پکانے کے اوقات میں گیس فراہمی کا کوئی مسئلہ درپیش نہیں، ٹیل اینڈ والے علاقوں کے صارفین کیلئے ایل پی جی سلنڈر متعارف کرائے گئے ہیں۔
ترجمان نے خبردار کیا کہ گیس کمپریسر کے استعمال کی وجہ سے بعض علاقوں میں پریشر کم ہے، گیس کمپریسر استعمال کرنے والے صارفین کا کنکشن منقطع کردیا جائے گا۔
